Iba lima nung tebilemtsü khurtem-II

– R. Imkong Lkr, 4th Mile Diphupar.

Iba lima nung tebilemtsü khuretem ya nisung shia-i pei kibong khuretji tang khuret amai züngshir, saka tangar indang khuretji kangabo süoki ia mebilemtsür. Yamaji tajung anogotem nung kaa itaa alirtemi balaka kanga timtema alirtem ya khen agi hau ta mali, saka timtema angudang meima bilemtsü melena temenü-ang menütsür aser ashir, tanü sensakertem ya pei sasa tali mashiba agi timtema tang alir ta bangkubtsü küma jembir.
Hau ni, oda noklang nung noklang shilem sensaker ajakji yamajibosa masütsü ta amanger. Kechiaser mashimaluba nisungtema aikasa ali nung pei sasa tali mashiba ajanga tanü kanga timtema aliba purtema aikasa lir. Saka meshimejunger sensaker aikati kanga meranga inyaka züsener, sakasa Tsüngremi pa mesüra la nem kechi kodaka tekulok shisatsü moatsü, iba yari-ji tang lia aor asünungji, item jagi kanga ochi shia alitsü meranger aser ilen mesüra külen nungi tapi agi anguba rongsentemji pei yangkhu “juli” nungji enoktsü khen agi mulungsentsü agi magizüker, saka pei kulok shisatsü Tsüngremi kechi kodaka moatsü aji agi tenük sünger ochi shia alitsü meranger.
Aser item “kaa itaa aliba” purtem khen agi menükshir saka pei kidang kibong nung kechi aka iba jagi tenük sünger liyonga aoba angur. Aser item purtem jagi tangar taka taitertem kibong nung shi aser angu peria nangdena yur jangratema chiyongtepba angudang kecha nükshia majir mesüra merepranger saka pei kidang kibong nung kechi aka, itemji bendena sürochioker nanganga chiyonger aser pei mapai aor aser meyipa arua chiyonger anisungzüka mejanger. Item purtem taküm arishi talanglang alir, kechiaser parnok atema shisapulutsü kecha maka.
Saka kodang kaa itaa lidir chitiyongdi tali akümer kechiyong parnok kidang kibong nung akab dak alaka “ aoun sen” chiyongtsü tasen ta shinerba, ya chidangang mesü shi “deer meat” kari agütsür alidang ano kari ninang tonglong “ bee hive” jungjunga sor aon curry tila ka ya chidangang ta bener arutsüdang, kibur tu pelaazunger par kidang ak lanu shi soa akaba den ano kulen ayongnu nungi pur adokba akong temerem to aser anget ngu aser zür tilala entsü semer soa akaba ajak to meyokteper chiyongerji kecha mechiyungnü-i ka chi chitep asembo nemshia chiyonger kulen ashir, awala tesüngmangtsüka chiyongtetogo ni hmmm ta anung tenzüker.
Yamaji mapang tatsüka tsüngda nung tepok tobo tanur ita tipuba mesüra tukupuba abener amai tuluka akumer. Idangji par medemer sensaker mersü aon den jangratema chiyongertem to agi ashir kabo medemer tajung mesüra saap ba nabo tanbaibo tanur ana jakrep aben amai-a to ta menütepa asayateper. Saka iba asaya meüntep nungji kecha tamajung malir. Yamaji chiyongtsü tajung nungji “calorie” tashi tulu aketba tali alir, aser oda oda bo tebok uluba to agi tangu sashitsü jangra medemi akumer. Tetezü sadok sadoka tangu mesashiteter aser oda oda bo mozü ki tajung bushia aotsüsa akumer aser Doctor-i ashi “ saap ba” nabo tang nungibo chi “ half plate without meat and fish” tang chiyongang ta ashir. Saka aon tasen “ new curry” agütsür aika aliba agi tali taliang tuluba chiyongtsüsa akumer aser chiyongtsü nung tashi tulu aliba mesüra aketba “ high class calorie” to ajema achitsüba to otsü mali akumer. Saka Doctor tsüngdangbo tashi angaa sayur, saka mapa agibo meyinyaker ta mapang tatsüka alir saka tejak tubo chakcha merema akumer oda tereprangtsü nungbo apple sungjang tamen ama alir. Kechiba ta süra chiyongtsü tajunga ta asubabo ajak achiba den ano mechiyongdang whisky tajungba to “cup” marok ana asemka chi anangtsü atema jema atar iba sülen to mezüng ashi ama chi chitep asembo mashia nemshia chiyonger kulenang ano jema amentsü atema bottle botula ao oshi half ka anunga yua akaba to tera anatanga akashia tak ta azunga ajemer. Iba sulentobo kisemer aser medemertem den to o tululu kecha marendagi tang jembir. Aser ashir hai meshimejungsang tu-a arua lir na? Na tekolok maliba agi sensak atender, anungji nabo alima nung mali süa adok nungang tajungba to ta ngasangngadema ashir. Saka mapang tatsüka lir kulen takarsang to tanga sashitsü tera saaka akumer aser iba sulen tobo mozü ki tajung ka bushia bener aor aser mozü ki to tongli tang oxygen pong to tepang o teni na ayimjema semloktsü, iba sulen tobo kanga junger amai akumer saka kima yimdong nung oxygen pong to semloker senzütsü masüji kodang oxygen pong to agizüka yudir ano kasa mezüng ama to akumer aser oda odabo tereprangtsü sentsü to tera melenshia akumer aser chi chiyongtsü to otsü maka akumer, kechiyong tebok nung chiyongtsü aliba to menüngsaba system to agi mapa meyinyaki akumer aser tatem nung tangu sashitsü to mekoki akumer.
Yamaji mapang tatsüka lir kulenbo tangu sashiba to anena doker aser kodang nisung ka taküm nung tangu sashiba “ respiration” anena kumdir, idangji taküm tatem akumer. Yamaji sensaker leni mao sang tang to nabo alima nung malianh tajungba ta takarsangi ngasangngadema ashiba nisung to tera akmesena anasa mena alidang tia to melenteper takarsang tuang alima nung ta malitsüsa akumer.
Anungji temeshi laishiba yamai ashir “pei sasa kechi prokdir pai ibaji arutsü” “As you sow, so do you reap”. Anungji taküm ya takar süale mesüra sensaker süaka, iba lima nung ainer ka ama tatsüka alidang ajak den liro medema alitsübaji kangsa tongtipang ta shisemer. Aser kari iba lima nung nisung o nisung na tsüngda nung tali meshira ano jungi-i tepenjem mapang nung naro junga ponga aliba mapang nung kari petzüker aoba ama akümtsü. It is liek plucking off a blooming flower by someone”. Tanü karbo taonung chiyongtsüa maka oda takar mapa nung ayangi or ang sen tera aazüka bener arua kinunger atema chang-o-tsü aser tanga onsotsü terara alir arua serochioka chiyongtsüba, ajia anema ali nung tang inyakttet. Saka karbo ki tajung süa yur chiyongtsü kechiang chir, kechiang machi nangdena yur jangratema alibaji Tsüngremer maongka tulu lir, saka iba mapangji tali meshira aiatai tia-i aitsü menua mali ta temeshi laishiba Amos tapu 5:11 nungji asükshijang merongtsüka zulua angur. Saka asenok aikati laishiba ya arok aroka nendaka mazüngba agi süoku ia mebilemer aser zü-züla tang alir, iba jagi item purtemdak tama ataloktsü atalokba asenok aikati ngua aruogo, saka ano temulung matanger. Ya kechi komaka ashi nungang angatettsü akoktsü ta rata mata bilemtsür. Anungji item ajak ya alima nung tebilemtsü khuretem lir, kechiyong tetenzük nungi Tsüngremibo nisung ajak tajung kümdaktsünüa yanglu. Saka oda lia liabo Tsüngrem anema apusutsü tenzük nungji pa mulung meyip aser alima aser idakji aliba meimchir aser shirurutem aser ozüsangnu ajak tzümetsüng agi samatsüba Noah tensa mapang nung atalokba angur. Aser ano iba sülena temenen kanga züinba ngua Sodom aser Gomora yimtitem samatsüba temeshi laishiba ajanga jangja jangja angur. Lipok 19:24-25. Anungji asenok ajaki metetsüba kaji tanüa alima tebilemtsü khuretemji ka sulen ka ta atalok yonga aotsü anendaka aka nungji ajaki kümdanga bilemdanga alitsü ayongzüker.