Ibai ‘Central Rule’ lir !

Taoba mapang Kohima aser Mokokchung town tiyong nung India nunger sepaitemi injang bomb yoka tai maketba nisungtem khasetba, dokan shibanga yur telong nung nisung lia  rongdoktsüba aser anüngdang town nung shishilembaa senzürtem dak prangpong agi atepba aser tetsüng agi metsüa yirutsüba ama lendong atalokra, ibaji Nagaland ya “disturbed area” asüba agi ataloker ta metettsüla. June 30, 2015 anogo nungi ano maneni küm ka asenok Nagaland nung alirtem iba ama tetsübutsü lendongbang ka nung alitsü tenzükogo. Iba telemtetba ya Union Home ministry ajanga agiba sülen osangkakettem ajanga metetdaktsüogo. Ajisüaka, iba telemtetba anema tang tashi nung Nagaland state sorkar dang masü saka Naga nunger lokti tentet katia ola madok nungji, Nagaland ‘disturbed area’ jenjang nung alitsü asoshi Center sorkari lemtetbaji shitaka ta agizükba den kasa asütsü.  Nagaland ama tesem ka “Disturbed Area’ asütsüsa kümdaktsübaji ” Armed Forces (Special Powers) Act, 1958 ozüng ajanga kümdaktsür. Aji oda, kodang tesem ka iba ozüng ajanga “Disturbed Area” ta sangdongdir, iba tesem nungji India nunger army-temi dang masü saka CRPF aser BSF ama paramilitary sepaitem nung tanishirtem nem pai temulung melemi bilemba nisungbo kasettsü dashi tashi agüja lir. Iba kasa ozüng ajanga sepaitem nem tashi agüja alibaji parnoki dang ki ka nung injang bomb yua lir mesüra yangji sepaitem anema inyaktsü purtem jenoka lir ta  ‘TEMOLUNG MELEMI’ bilemra, iba tesemji mesüra kiji makdoktsü mesüra raksatsütsü akok ta shia lir. Aji oda, ajungbenaka, Nagaland nung India sepatemi ki ka nung bomb ajungoktsüra mesüra makdokra, parnoki ‘temulung malem’ bilemba agi asütsü. Asenok asoshi lendongji aji lir. Temulung malemba kija masü saka shitakba nunga ki ka nung injang bomb yua lir mesüra India sepai anemertem lir ta asünunga, iba kiji timi mittsü mesüra yangji alirtem temai adoktsü asoshi mapang peria agüja inyaktsü linük ozüngi temeten agüja lir, saka iba ama tim ozüng alema ‘temulung malem’ kija bilemba agi asenok kasetra, asen ki rongdoktsüra aser asen ki poksaktsüra, iba dang nungi tetsübutsü taketba ozüngbo alima kecha nunga malitsü. Ibaji tatem masü saka iba ozüng ajanga sepaitemi inyakba anema Union sorkar temelaba magi obendangdak kecha nunga ken o benoktsü makok. Iba nungji senso ka temeten dang masü saka teimla dena samar. A rmed Forces ( Special Powers) Act ya akhidang India nung British nunger yimsüsüba mapang, Mahatma Gandhi nunger lenisüba nung 1942 küm August 8 nü All India Congress Committee senden alidang British nunger dang India toktsür oang ( Quit India) ta ashitsü telemtetba agi aser iba telemtetbaji mapa küma inyaktsü asoshi India nungertemi British sorkar anema apuso, anungji item anemertemji ajemreptsü asoshi  British sorkari ” Armed Forces (Special Powers) Ordinance” ozüng ka latet. Iba ozüngji amshia British nunger sepaitemi India nunger nüchiso bushir aika kasetogo. Tia maka, kodang India nüjiso angu, 1958 küm Naga nunger yimten nüjiso bushirtem ajemreptsü aser samatsütsü asoshi kasa British nungertemi latetba ozüngji India sorkari tesashiba küma yanglushir lalet. Atangji, iba ozüng ya latettsü asoshi India tatar senden Lok sabha nung 1958 küm August 18 nü benoka jembidang, Homer minister, G.B.Pant-i, “Naga Hills nung India anemer Naga nungertem den raratsü asoshi army yoka lir aser itemji kümzüka ayutsü asoshi iba ozüng latettsü nüngdak adoker,” ta metetdaktsü. Atangji, iba ama nübortem dak temulung melemtetba kija agi kaseta endoktsü dashi ‘Non Commissioned Officer’ ka nem tashi agütsüba anema tatar aikati nokdak saka mangai iba ozüng ya latet. Disturbed Area masüdakbo nisung dak akatsü tashibo army dakbo mali saka asenok dakbo parnoki dang temulung melemi bilemra akhatsü akok. Atangji, tang ya asenok President’s Rule nungbo masü saka “Central Rule” nung lir, kechiyong ‘disturbed area’ ka ama merenshitsü center sorkari latet, anungji state sorkari mesüra district administration-i asenok mekümzüktettsü !

You must be logged in to post a comment Login