Ilunga teinyak

“Pa maru tashi kecha O tebendang” (1 Korint 4:5).
Tanü asenok taritep putu ka nung alir. Taritep lima nung alidang asenoka ilunga alitsü angazükdaktsür. Saka Nazareth nung süng mapa inyaker tatasaji ajiang. Tang, nüktapangtatsür ka nüktapangta nung apu. Tai apurtemji Lai tesayurtem aser Tekülemdak tanishirtem liasü. Parnoki Yisu nungi telangzüba ka aginü. Saka Pai angüma lur Pai kecha mangashir ama ali nung zülu. Tanishirtemi maneni asüngdang nung, Pai langzü, “Nenok rongnung shiba temenen mali, pai la dak tama lung agi onang.” Parnoki angatet, aser la dak lung agi aontsü shiba temeten aka, pa kija la jakdang yutsür ka khen, ka khen ta oadok. Idangji Yisui la dang ashi, “Nia na maitsür!” (Yn. 8:1-11). Pa temeim tatasaba asenok dena kasa lir.
Yisui aritepa meinyaker. Pai süngjem süngjema tiaji asadanga dang inyaker. Pai taitsür aser tai agütsür ji tutanger. Pai mapang agia ali nung zülu. Asenokia koda inyaktsü memetetdang, mesüra tia koda agizüktsü mejangjadang paper nung mesüksar ama ?
Mapang matongdang kecha o mebendangtsü asenok nem ozüng agütsü (1 Kor. 4:5). Aibilener dang asenoki atasadi; parnokia asenok dang atasaa alitsü akok! Obendang jitjit ta agütsüba ajanga telungjem raksar. Asenoki tangar dang atasaa melira asenok khuretji koda ka asütsü? (Mt. 18:21-35). Alima temenen O bendangtsü asoshi Yisui ilungaka aruadoker lila. Saka Pai menua alir kechiaser Pai shinga mesamadaktsünü nung temulung meyiptsü ataa alir (2 Peter 3:9). Teloki Pai atasaa alibaji mangatetter, saka Pai teloki bilembaji mesükshir. Pai parnok tekümtet asoshi bilemer.
Kasa tebilemba nisungtemi asenoki hai-aura kaa atar ta bilemtsü. Saka asenoki Yisui tetsürla dang inyakba ama anir arutsü ataa alitsüla (Gal. 6:1). Tangar nütsüng kümdaktsütsü asenok aja, asenok taritep nung parnok raksatsütsü atema masü. Aiben asenoki mangatetti O bendang agütsür aser asenok sasa obendangba bena arur (Mt. 7:1-5).
O Kibur, Nai kü dang aremzüka ataba ama, ni kiyonger aser medemertem dang aremzüka aser atasaa inyaktsü Ne taochi kua. Amen.

You must be logged in to post a comment Login