Independence Day tenüng nung “Halleluiah Nigeria” sentong agitsü

Abuja, September 13 (Agencies): Nigeria linük nüjiso ngur küm 57 buba ajungba benjung amungtsü lia Khristan telok kati ghonda 400 Tsüngrem tenüngsang asangtsü sentong ka atonga lir.
Nigeria linük nung telemsa adokdaktsü atema tayongzükba jenti ajuruaka Tsüngremi linük meloksaktsüi moatsüba atema parnoki tenüngsang agütsütsü.
Iba tetushi agütsüba sentong ya October 1, 2017 nü agitsü aser iba nung Tir Muhammadu Buhari aser Tatong Tir Yemi Osinbajo nati anir sorkar tongti ketdangsertem aika adentsü.
Christian denomination balala nungi arogo choir 140 dak tema iba tetushi agütsüba sentong nung adentsü shiogo. Parnoki Tsüngrem nem tenüngsang agütsütsü aser ano Tir Buhari küm anabuba tir inyakdang pa temang anema kümdaktsüba atema tenüngsang agütsütsü.
Abuja nung osangbener den jembidang, Coordinator Joseph Oluseyi Malomo-i ashiba agi, iba sentongji Independence Day matongdang tenzüktsü aser Christian Association of Nigeria (CAN) den volunteer noklang aikati nungita yarir.
Parnoki Tsüngrem dang pelar ta ashitsü atema “Halleluiah Nigeria” ta nüngja ayu, ta Malomo-isa ashi.
Brihostibar nungi Aso villa Chapel-i Nigeria arogo balala nungi choir 140 dak tema den yaritepa sentong nung shilem agitsü aser tatembang sentongji National Christian Centre, Abuja nung agitsü, ta paisa shisem.
“Hallelujah Nigeria ya Nigeria nung aliba arogo aser fellowship ajak den yaritepa ayongzüker aser Tsüngremi asen linük meimba atema pelar ta ashitsü aser Pa nem tenüngsang agütsütsü” ta Malomo-isa metetdaktsü.