India aser China nati arrtsü onüktem nung senden amen

New Delhi, November 17 (Agencies): Doklam nung India aser China sepaitem tsüngda tensa süngjemba sülen ita ishika tsüngda linük anati lenji arutepa yimjung yanglutsü nükjidong nung Hokolbarnü linük anaprong nungi ketdangsertemi arrtsü mangatettep onüktem nung o lemtepogo.
Tanü China yimtiba, Beijing nung 10buba round Working Mechanism for Consultation and Coordination (WMCC) senden nung linük ana nungi ketdangsertemi arrtsü dak sendakba onüktem nung o lemtep.
Senden tembangba sülen Indian External Affairs Ministry-i sangdong ka ajanga, “Iba sendenji tajung tebilemba nung aser teimla tasen yur amen,” ta metetdaktsü.
“Linük anapronglai India-China arrtsülen sector ajak nung tensa reprangshiogo aser linük ana tesendaktep aintsü atema arrtsülen yimjung aser tesünep alitsüji nüngdak ta bangjemogo,” ta sangdong nungsa shia lir.
“Iba dak sendakba nung linük anapronglai kati ka dak tamang katettsüsa mera agia inyaktsü aser mitkar ana tsüngda mapang ajak nung tongtepratepa alitsü atema tebilemba lemsatep,” ta kasa sangdong ajanga metetdaktsü.
Tanü iba senden nung Joint Secretary (East Asia), MEA, Pranay Verma leniba nung India nungi ketdangsertemi China ketdangsertem den arrtsü dak sendakba onük aika nung o lemtep.
Linük anaprong nungi senden nung adenertemji diplomatic aser mitkar ketdangsertem liasü.
Working Mechanism for Consultation and Coordination ya 2012 küm tenteta liasü aser iba ya India aser China na tsüngda arrtsülen yimjung atema longjemer inyaktsü nükjidong nung tenteta liasü.