India aser Japan nati amalitepa inyaktsü tezüngzüktep 15 agi

Gandhinagar/New Delhi, September 14 (Agencies): Brihostibarnü India aser Japan nati maneni amalitepa inyaktsü atema tezüngzüktep 15 agiba den külemi China anema Indo-Pacific region nunga taliba amalitepa inyaktsü bangjemogo.
Tanü Ato kilonser, Narendra Modi aser Japan Ato kilonser, Shinzo Abe nati linük ana dak sendakba onüktem, regional aser international onüktem nung o lemtepba den külemi shishilembaba, security aser civil nuclear energy nung amalitepa inyaktsü jembiba sülen item tezüngzüktep agi.
Tenati osangbenertem senden nung jembidang Ato kilonser, Modi-i, India-Japan tesendaktepji linük ana tsüngda mesüra regional onüktem kija nung masü saka alima onüktem nunga lir, ta metetdaktsü.
Ano Abe-ia, “Külem sangdong ka nung onoki sign süogo, koba ajanga Japan-India tesendaktep nung alizüng tasen ka atongtsü. Iba nungji ajemdaker onoki Japan-India asalentongtem aser global partnership tashi itdakja Indo-Pacific region aser alima ajunga nung yimjung aser azükaru alitsü atema inyaktsü,” ta metetdaktsü.
Tawa Malabar Japan-India-US naval exercise agiba dak sendakba nung Abe-i, maneni iba exercise tashi itshitsü, ta metetdaktsü.
Ano külen tanga osang ka nung, India-Japan nati külem sangdong ka ajanga Pakistan nung amenoka aliba kiralongrar teloktem sangdong.
Tanü India aser Japan nati, kiralongraba magizüktettsü aser linük anati senteper Lashkar-e-Toiba (LeT) aser Jaish-e-Muhammed (JeM) densema Pakistan nung amenoka aliba kiralongrar teloktem anema raratsü, ta metetdaktsü.
Pakistan aitsüba olen ka nung Modi aser Abe nati külem sangdong ka ajanga alima linüktem dang kiralongrar jenokdakja aliba kaktettsü, aser item tesem nung aliba infrastructure, networks aser senotsü aruba lenmangtem raksatsütsü, iba den külemi arrtsülen kiralongrartem senzüba nokdangtsü ayongzük.
Kiralongrartemi 2008 küm Mumbai amakba aser 2016 küm Pathankot amakba dak sendakba nung lenir anati Pakistan aitsüba den külemi aibelenertem nem temerenshi agütsütsüla, ta metetdaktsü.
Linük anati külem sangdong ka ajanga, “Ato kilonser Modi aser Ato kilonser Abe nati kiralongra anema 5buba Japan-India consultation on terrorism ayongzüktsü aser Al-Qaida, ISIS, JeM, LeT teloktem den parnok den adenba teloktem anema taliba amalitepa inyaktsü atema jembitsü,” ta metetdaktsü.
Modi aser Abe natisa UN züngsem linüktem dang, kiralongrartem anema UNSC bangzüng 1267 mapa küma inyaktsü atema ayongzükogo, ta linük ana külem sangdong nungsa shia lir.
Joko küm ishika India-i alima sabang balala nung Pakistan nung amenoka aliba kiralongrartem tenüng sangdonga maaksüja arudar.
Tan ita tetenzüklen BRICS linüktemia Pakistan nung amenoka aliba kiralongrar teloktem- Lashkar-e-Taiba, Jaish-e-Mohammed aser Haqqani network sangdonga kiralongra aija liasü.
Xiamen yimti nung ayongba senden nung BRICS (Brazil, Russia, India, China & South Africa) linüktemi Taliban, ISIL/DAISH, Al Qaida aser item telok den sendaka aliba Eastern Turkistan Islamic Movement, Islamic Movement of Uzbekistan, Haqqani network, Lashkar-e-Taiba, Jaish-e-Mohammed, TTP aser Hizb ut-Tahrir teloktemi rara adokdaktsüba atema tebilemtsü akar, ta sangdonga liasü.