India aser Pak na kiralongraba onük jembitsü bangjemogo

July 10, 2015 nü Ufa, Russia nung Prime Minister, Narendra Modi-i SCO Heads of State Council Plenary Session nung o jembiba angur.

Ufa (Russia), July 10 (Agencies): Hokolbar nü Russia, Ufa yimti nung Shanghai Cooperation Organisation (SCO) senden nung mapang apir Ato kilonser, Narendra Modi aser Pakistan Ato kilonser, Nawaz Sharif na senden amenba mapang India aser Pakistan na tanaben asüngsashir ken o maneni jembitsü aser Mumbai bomb lendong ken o tekaraba nung tembangtsü asoshi lenmang bushitsü bangjemogo.
Iba dak alia sangküm Pakistan yimtiba, Islamabad nung SAARC senden nung Narendra Modi-i Pakistan semdangtsü mulungogo.
Küm ka sülen tang mezüng Modi aser Sharif na linük ana tesentaktep asoshi senden ghonda ka jungnüa Ufa, Congress Hall nung menogo, aser iba mapang nung taruba ita mesüra September ita nung linük ana nungi National Security Adviser Ajit Doval aser Sartaj Aziz na New Delhi nung ajurutepa kiralongraba dak sentakba onük ajak süoka jembitsü asoshi bangjemogo.
Osang ajangasa ashiba agi item telemtetba nungji timtem adoktsüa akok, kechiyong Aziz ya Pakistan nung kanga akhümtsübuba lenir ka lir aser Pakistan Army temia pa dak kanga temulung alemer.
Modi aser Sharif na kiralongraba indang tongtibangsüa jembia liasü, kechiyong India-Pakistan tesentaktep nung tetsüktaktsü tulubaji kiranglongraba lir ta India-i bilemer.
Yaküm May ita nung Ato kilonser menden asoshi Modi tenangzükba agiba nung adentsü asoshi Sharif-a arua liasü aser tena tsüngda tesentaktep ken o jembiogo, ajisüaka yaküm November ita nunga SAARC senden nung adentsü asoshi tenaprong Kathmandu nung ajurutepa liasü saka sendenbo mamen.
Tena senden amenba sülen linük ana külem sangdong agütsüba aser osangbenertem senden nung Foreign Secretary ana- S Jaishankar aser Aizaz Ahmad Chaudhry napronglai Kashmir indangbo kecha melemsatep.
Sangküm Pakisan nung SAARC senden nung adentsü asoshi Sharif-i Modi jaok aser pai ibaji mulunga agizükogo.
Yimjung aser terenlok asoshi India aser Pakistan napronglai longjemer inyaktsü atema lenir ana tsüngda mulungtepogo, aser iba asoshiji tongtibang ken o ajak jembitsü renema lir, ta sangdong ajanga ashi.
Lenir anapronglai kiralongraba maparen ajak anemer aser South Asia nung kiralongraba mapa anendaktsütsü asoshi linük ana tsüngda amalitepa inyaktsü lenir ana bangjemogo, ta sangdong ajangasa shisem.
Linük anapronglai pua aliba angopurtem aser parnok meyong rongtem anogo 15 tsüngda chioktsü melungtepogo.
Osang ajangasa ashiba agi, tang India nunger angopur 355 Pakistan tepoukdak balala nung lir aser Pakistan nunger angopur 27 India nunger tepoukdak balala nung lir.