India-EU-i shishilembaba aser security tesendaktep atema bangjem

India-EU-i shishilembaba aser security tesendaktep atema bangjem

New Delhi, October 06, 2017: Hokolbarnü New Delhi nung 14buba India-EU senden nung European Council Tir, Donald Franciszek Tusk, India Ato kilonser, Narendra Modi aser European Commission Tir, Jean-Claude Juncker nunger külemi tangokba noksa nung angur.

New Delhi, October 06 (Agencies): Hokolbarnü India aser European Union-i shishilembaba aser security tesendaktep tashi itshitsü atema bangjemogo; Delhi nung 14buba India-EU senden nung Ato kilonser, Narendra Modi aser EU lenirtemi India-EU, regional aser International onüktem nung o lemtetba sülen iba tezüngzüktep agia liasü.
Iba den külemi India aser EU-i senteper alima nung kiralongraba anema amalitepa raratsü bangjema liasü.
Iba senden sülen European Council Tir, Donald Franciszek Tusk, European Commission Tir, Jean-Claude Juncker aser den Ato kilonser, Modi nungeri külemi osangbenertem senden nung jembidang iba osang metetdaktsü.
India-EU-i tezüngzüktep asem agi, aser iba nungji International solar alliance densema lir.
Linük 28 dena aliba bloc (EU) ya India atema regional trading partner tulutiba lir aser 2016 küm telok ana tsüngda US sen billion 88 jenjang shishilembaogo.
Ano India atema EU ya Indian exports tulutiba lir aser investment den technologies atema tongtibang partner lir.
2000 küm nungi 2017 küm tashi nung India-i Europe nungi US sen billion 83 jenjang foreign direct investment (FDI) nguogo, aser ibaji India indang FDI shilem 24 shi asütsü, ta Ministry of External Affairs otongdar, Raveesh Kumar-i metetdaktsü.
India aser EU na ya 2004 küm nungi strategic partners lir. 13buba India-EU Summit taküm March 30 nü Brussels nung mena liasü.

You must be logged in to post a comment Login