India-i Myanmar dang Khaplang den tanishir 3 meshir

New Delhi, August 18 (Agencies): India-i Myanmar dang NSCN-K nung tongti tanishir pezü parnok ket nung agüjang ta mepishia metetdaktsüogo.
NSCN(K) tanishirtem rongnung S S Khaplang dena lir aser India-i parnok ajakji June 4 nü Manipur nung sepai 18 khasetba atema aitsür.
Khaplang den külemi Niki Sumi, Kirichu aser Asang nunger lir aser iba temepishiba ya taoba ita New Delhi nung India-Myanmar Joint Consultative Committee mapang agütsü, ta tanü sorkar osang ajanga metetdaktsü.
Par pezü yagi India nunger sepaitem amaktsü atema tasa atonga inyak ta India nunger ketdangsertemi Myanmar telok dang ashi.
Ajisüaka, Myanmar teloki NSCN-K tanishirtem India ket nung agütsütsü atema tenangzükba kecha magütsü.
Khaplang ya Myanmar nungi Naga nunger ka lir aser Manipur nung sepaitem amakba anogo nung pa Yangon nung mozü ki ka nung temang anepaluya liasü.
Ajisüaka, iba tatalokba sülen pa Taga nung par tesepi meyipa ao aser iba ya Sino-Myanmar arrtsü anasa lir.
Tanüngba NSCN-K tanishir asemji Myanmar nung lir aser parnok Taga aser tanga teseptem nung melentepa alir ta India-i bilemer.
Manipur nung sepaitem amakba sülen Indian Army commando temi Myanmar arrtsü nung NSCN-K teseptem amak.

You must be logged in to post a comment Login