India-i ODI Series akok; BCCI-i senpet sen Lakh 21 agütsütsü nangzüker

India’er tetsür cricket teloki New Zealand madak takok anguba sülen ODI Series takok marok amer pelatepba noksa ka yangi angur. (Bengaluru, July 08)

Bengaluru, July 06 (Agencies): Thirush Kamini aser Deepti Sharma nati külemi lungjemer runs 100 dak tema yangluba densema India tsürtemi wicket 9 agi New Zealand madak pungobuba aser tatembangbuba One-Day International (ODI) Series asaya tanü Bodbar nü kokogo.
Kamini-i ball 78 nung runs 62 aser Sharma-ia ball 78 nung runs 44 yangluba densema par India teloki overs 27.2 nung runs 121 yangluteta overs 41 nung runs 118 yangluba New Zealand telok madak points 3-2 ngua asaya 5 densemba ODI series-ji akok.
New Zealand skipper, Suzie Bates-i runs 42 aser Anna Peterson-i runs 22 tashi yanglua par telokia kanga meranga asaya saka tamakok angutsüsa aküm.
India’er bowler, Jhulan Goswami aser Sharma na den külemi, left-arm spinner Rajeshwari Gayadwak nungershia tanü India asoshi wicket anana agia takokbaji bener arutsü.
Ano külen, India ajunga nung cricket asaya ketdang asüba tentet, Board of Control for Cricket in India (BCCI)-i India’er tetsür cricket team nem senpet sen lakh 21 tashi agütsütsü tenangzükba olen ka metetdaktsüogo.
“Skipper Mithali Raj-i aniba India’er tetsür cricket teloki New Zealand madak takok ngua India nem konang tulu bener arutsüba nüngtem nung par telok nem senpet sen lakh 21 agütsütsü nangzüker,” ta BCCI Tir, Jagmohan Dalmiya-i metetdaktsü.