India-i pei sasa kümzüka litettsü: Parrikar

Lucknow, July 09 (Agencies): Ato kilonser Narendra Modi aser Pakistan Ato kilonser Nawaz Sharif na Russia, Ufa yimti nung ajurua senden amentsü anogo ka lia tanü Union defence minister Manohar Parrikar-i, India-i pei sasa kümzüka litettsü, ta ashi.

Anogo ishika tejaklen (taoba Hombar) Pakistan defence minister Khawaja Asif-i, nüngdak dak adokra Pakistan kümzüka alitsü asoshi nuclear raraba oset amshitsü, ta India amokmerena liasü.

“India nung ni defence minister lir. Ni kü mapa junga meteta lir. Aser iba ya ni nenok dang ashir, India-i pei sasa kümzüka litettsü,” ta Manohar Parrikar-i ashi.

July 6 nü osangtsüsang channel ka den jembidang Pakistan defence minister Asif-i, “Iba meraji magitsü asoshi asenoki sarasademdi, saka nüngdak dang süra asenok taküm alitsü asoshi amshitsü, asenoki amshitsü,” ta jembia liasü.

Geo News programme ‘Jirga’ den jembiba mapang Asif-i, nuclear raraba oset amshitsüji takoktsü mapa ka lir, kechiyong item raraba osetji noksa atema ayuba masü saka nokdangtsü asoshi lir, ta ashi.

Mumbai amakba nung tongti aibelensang Lakhvi Pakistan-i chiokba aser China-i UN nung ibaji pusemba dak sentakba nung Bodhbar nü Ato kilonser Modi-i China Tir, XI Jinping dang, Lakhvi chiokba onük nung Beijing-i United Nations nung Pakistan pusembaji magizükteter, ta shiogo.