India-i Silver ka, Bronze ana ngutetogo

Naypyidaw, Tsüklai 09 (Agencies): Rogonü Naypyidaw, Myamnar nung aliba Wunna Theikdi Sport Stadium nung Asian Championship Para-Cycling asaya nung India team-i shilem tajung agia takok asem ngutetogo.
Taoba küm silver medal angur aser Bengalore nung alir Divij Shah-i India team para-cycling tetoktepba nung ano silver medal ka ngutet. Iba asaya kasa nungi BSF (Border Security Force) sepia Harinder Singh-i bronze medal ngutet. Taoba küm-a pai iba kasa sempet ngua liasü.
Hand-cycling asaya nung asayar tasen, Madhu Bagri-i bronze medal ngutet. Iba asaya telemsa nung lai (Madhu) India atema mezüng Para Cyclist tetoktepba nung international medal angu lir.
“Ni takok angur ajak den tepela lemsatepner. Iba takok tulu ajangzüktetba agi parnoki ano India nung para-cycling atema tenüng tajung bener arutsü. Amanger onoki tarutsü nunga tajungtiba nung shilem agitettsü,” ta Myanmar nung Aditya Mehta-i ashi.
India nung Aditya Mehta Foundation (AMF) nung pai item asayartem anioka Para Sports atema Cycling Federation of India (CFI) nungi teyari agia training aguja arudar. Iba ajanga India nung Para Cycling ajungketsü atema inyaker.