India nung address kuli atema passport mamshitettsü

New Delhi, Aenjeti (January) 12 (Agencies): Ministry of external affairs-i kobi melii tapak tatembangba maliba passport tasentem agütsütsü ta Rogonü (Hokolbar) metetdaktsü.
Iba ya ajanga tarutsü nungbo passport ya address proof atema mamshitettsü ta sayur, kechiyong passport tapak tatembangba nung residential address dena lir.
Ministry of External Affairs aser Ministry of Women and Child Development nungi ketdangsertem adenba luden kati junger ta ashiba nung ajemdaker telemtetba agi, ta tanü Foreign ministry otongdar Raveesh Kumar-i ashi.
“Passport nung tebu tenüng meinoktsüla ta tetsü/tanurtemi ashiba aser ano tsürabur la dang aliba tanurtem den ano adopt asüba tanurtem indang tebilemtsütem ajak ludeni benoka angadangogo” ta paisa ashi.
“Luden-i tebilemba shidangbatem rongnung Ministry of External Affairs-i Passport Booklet nung father/legal guardian, mother, spouse, aser address tem agientsü atema liasü” ta paisa shisem.
Ludeni ashibatemji ministry-i kanga junga shisadang aser iba denji International Civil Aviation Organisation indang telatetbatem (machine-readable travel documents) reprangdang aser tatem nung Passports Act, 1967, aser Passport Rules, 1980 kübok agütsüba passport aser tanga travel documents nung tesülen tapak memenüngtsü telemtetba agi, ta Raveesh-isa metetdaktsü.
Passport ya sentsü asem- temerem, temesüng aser anüng sentsütem nung menünger. Sorkar ketdangser nem temesüng, ambassador tem nem temerem aser tanüngba senso ajak nem anüng sentsü agütsür.
Passport nung tapak tatembangba memenüngtsü anungji emigration checks nüngdakba nisungtem nem sorkari orange colour passports agütsütsü, ta Ministry of External Affairs otongdarisa ashi.
Ajisüaka, iba telemtetba kübok passport tejen amshirtem maiter aser tembangtsü anogo agüja aliba tashi amshitettsü, ta paisa shisem.
Nasik nung aliba Indian Security Press-i kobi melii passport tasentemji menüngtsü. Ajisüaka, passport tasenbaji ministry ket matong tashi tatembangba tapak nung details menüngtsü, ta paisa metetdaktsü.