India nunger aluyimertemi lenmang balala nüngdaker: Tir

Kanpur, Tsüklai 15 (Agencies): Tanü linük Tir, Ram Nath Kovind-i, India linük tesem balala nung aluyimertemi parnok tebilemtsü onük atema lenmang balala nüngdaker, ta ashi.
Kanpur nung aliba Chandrashekhar Azad University of Agriculture & Technology (CSAUT) nung ‘Agricon 2018’ aser ‘Agriexpo 2018’ senden nung jembidang Tiri, “India ama linük tulu ka nung linük tesem balala nung aluyimertem tebilemtsüji-a balala alir. Parnok nüngdak apir onoki inyaktsü,” ta metetdaktsü.
Tirisa, linük nung tsük timba züsentettsüla, iba den külemi tanu putu den apet dairy farming, animal husbandry aser fisheries, poultry, horticulture aser sericulture ajungkettsütsüla, ta ashi. Paisa, aluyimertemi jenjang timba agi yoktettsü atema chiyungtsü wazüka ayuba industry aika lapoktsüla, ta ashi.
“Ajak atema tzü ya tebilemtsü onük ka lir. Iba dak sendakba nung sorkari ‘per drop, more crop’ ajungkettsüogo, aser iba ya linük nung aluyimer ajak nem metetdaktsütsüla,” ta paisa ashi.
Tiri, “Kodang linük nung züsentetba ka tanga linüki yokdir, iba nungji India tenüng-a densema lir, anungji aonsotsüji International standard nung asütsüla,” ta ashi.
“Sorkari asen Armed Forces aser aluyimertem naprong nem tashi agutsütsü atema inyaker,” ta paisa metetdaktsü.