India nunger nütsüng 127,42,39,769 jungogo

New Delhi, July 11 (Agencies): Tanü nikongdang India nunger nüstüng 127,42,39,769 ajungba aser linük nung küm shia nütsüng shilem 1.6 ainba osang jangjaogo aser 2050 küm tashi nungbo alima nung nütsüng timtiba linük akümtsüa akok, ta osang ka ajanga metetdaktsüogo.

Tanü World Population Day anogomong nung Honibar nikongdang 5:00 ako nung India nütsüng 127,42,39,769 jungogo aser iba ya alima nütsüng shilem 17.25 lir, ta Union health ministry kübok nüngtsüng renlokba tebilemtsü asoshi inyaker Jansankhya Sthirata Kosh mesüra National Population Stabilization Fund (NPSF)-i metetdaktsü.

Iba tentet ya ajanga nütsüng tali arenba dak sentakba tebilemtsütem asoshi inyaker.

India nunger nütsüng ya alima nung nütsüng timba aliba linük China (nütsüng billion1.39) dang nungi tekaraba arener, ta NPSF ketdangser kati ashi.

2050 küm tashi nungbo India ya nütsüng timtiba aliba linük akümtsüa akok, ta ketdangerisa ashi.

“Tang aliba nütsüng arenba rate nung maneni ora 2050 tashi nungbi India nüngtsü billion 1.63 akümtsü aser China nütsüng adenatoktsü,” ta ketdangseri ashi.

Tanü iba dak sentakba sentong ka nung jembidang health minister J P Nadda-i nütsüng azüokba nükjidongtem ataloktsü asoshi development partner tem aser NGO temi sorkar yarisemtsüla ta shiogo.

2011 Census nung India nunger nütsüng billion 1.21 billion liasü, aser ibaji züngdangbaji USA, Indonesia, Brazil, Pakistan, Bangladesh aser Japan linüktem nütsüng ajak senteper India nütsüng den kasa dang adoker.

Ano India nung aliba state nütsüng aika linük ka den nütsüng kasa asüba mesüra tali adokba lir.

Tatishitsü agi, India nung Uttar Pradesh state nütsüngji Brazil linük nütsüng den kasa lir. Brazil ya nüngtsüng timtiba aliba tarensen pongububa nung lir.

You must be logged in to post a comment Login