India solar company-i Australia nung mapa agütsütsü

Sydney, August 10 (Agencies): India meyong Global Wind Power Limited-i Australia nung aliba Heliostat den lokteper inyakyim ka tenzükba ajanga South Australia nung mapa malirtem atema mapa angutsü asoshi lenmang lapoktsü, ta Hombar nü media ajanga metetdaktsüogo.

Heliostat, South Australia ya anü tashi agi amshiba osettem tali relokdaktsütsü asoshi tenzükba lir, ta ABC osang ajanga ashi.

Iba project ya küm pezü shi nung tembangtsü akok aser tang iba tesem nung alirtem rongnung nisung 150 ang mapa ngur alibaji iba project tasenba tenzükba sülenbo nisung 1,000 shi mapa angutsü, ta Heliostat nung executive chairman Darrin Spinks-i ashiba osang ajanga metetdaktsü.

Mapa tasak timba ka India nung tembanga inyaktsü saka manager aser engineer tembo Adelaide nungi dang acha ayangtsü, ta pai shisem.

“India nung alirtem nema mapa angütsü asoshi parnoki iba sentong ya mezüng yongi renemer liasü,” ta Spinks-i ashi.

South Australia nung aliba nüburtem mapa angutsü kanga tasak lir. Tan iba project tenzükba ajanga mapa anguba tang masü saka linük nung industry-a tasen ka lapoktsü.

“Onoki industry tasen ka tenzüktsü ta ashidang, ajia komala industry ka asütsüaka? ta nüburtemi asüngdanga liasü,” ta Spinks-isa ashi.

You must be logged in to post a comment Login