‘India tasenba’ ji Northeast nungi tenzüktsü: Assam CM Sonowal

New Delhi, September 16 (Agencies): Ato kilonser, Narendra Modi indang mangdang, ‘India tasenba’ ji North East nungi tenzüktsü, kechiyong iba tesem ya sorkar indang South East Asia connectivity project tenzükdak lir, ta tanü Assam Chief Minister, Sarbananda Sonowal-i metetdaktsü.
“Act East policy ajanga Guwahati ya South East Asian connectivity tiyongtsü ka kümdaktsütsü onok nükjidong lir. India tasenbaji North East nungi tenzüktsü ta ni amanger,” ta paisa ashi.
Sonowal-i ashiba agi, Ato kilonser, Narendra Modi-i North East region ya India aintsü atema hadir tasen ka südaktsütsü atema inyakba nung par sorkari meranga inyaktsü.
Tanü New Delhi nung anogo ananü North East Students & Youth Summit 2017 tenzüktsüba sentong nung jembidang Sonowal-i, “India tasenba atema Assam junga yangertsü asoshi asenoki mapang agütsüteta meranga inyaktsü tenangzükba agidi,” ta ayongzük.
Pai ashiba agi, Union Finance Minister, Arun Jaitley den pai Hindustan Paper Corporation indang paper mill ana asentenshitsü aser tekaraba nung industrial policy tenzüktsü atema jembiogo.
“Tanübo North East tesem ya asüngsashi tulu adoktsü jenjang ka nung lir, aser iba ya asenok dak tashi aliba jangjaa lanurtemi anir inyakba ajanga lir,” ta paisa metetdaktsü.

You must be logged in to post a comment Login