Indian Army ketdangertem Hornbill benjung nung aden

Dimapur, December 6 (TYO): Hornbill benjung anogo trokbuba “Culturally Yours” ta ser sobaliba sentong nung Lt General, Anil Chauhan-i tongti tesemdanger aser Vice Chancellor, Guwahati University, Dr. Mridul Hazarika-i tetushi süa jaoker ama shilem agiogo.
Hornbill benjung ya 2000 küm state sorkari Naga nung kin balala indang sobaliba sayutsü atema tenzükba lir aser iba benjung ya statehood day den külemi amunger ta tanü Lt. General Anil Chauhan-i o jembidang ashi.
Iba benjung ajanga Nagaland nung aliba nübortem tera yangdaktsüba den loktiliba nung tesünep aser puteptsü indang tangatetba ajungketer. Iba benjung ajanga Nagaland nung alirtemi linük kübok tanga state tem den sendakteptsü maongka agütsü, ta Chauhan-isa ashi.
Nagaland nung amenoka aliba Assam Rifles aser Army temi iba tesem nung yimjung lidaktsütsü atema mapa inyaker. Akokba tashi Assam Rifles aser Army nati Nagaland nung alirtem yaritsü, ta paisa shisem.
Tanü sobaliba sentong nung Khiamniungan Cultural Troupe-i Khaozaosie (Dance of Merry Making), Phom Cultural Troupe-i Sho Shinpu (Demonstration), Rengma Cultural Troupe-i Topfü Modu aser Kuki Cultural Troupe-i Suta lam shilemtem agi.
Maneni, Kachari Cultural Troupe-i Baijubu (Serpentine Dance), Sumi Cultural Troupe-i Alukumlale (folk song), Sangtam Cultural Troupe-i Singing in praises of Hornbill Festival, Angami Cultural Troupe-i Mekhruseipie aser Garo Cultural Troupe-i Anding O’ka shilemtem agi.
Tanü anüngdang sentong nung AVSM, VM, Air Officer Commanding in Chief, Eastern Air Command, Air Marshal, Anil Khosla-i tongti tesemdanger ama shilem agia liasü.
Iba mapang Chang Cultural Troupe-i Local Grinding Tool Song-, Zeliang Cultural Troup-i Tinggeune Lim (Honey Bee dance), Yimchungru Cultural Troupe-i Are Jangachihkhi aser Pochury Cultural Troupe-i Shaho Shaho shilemtem agi.
Iba sentong nungsa Konyak Cultural Troupe-i Yangkhum (Burial Rites), Chakhesang Cultural Troupe-i Hozhale (folk song), Ao Cultural Troupe-i Alu Meyo aser Lotha Cultural Troupe-i Amongi Namvu Hono Chete Merengta (traditional games) shilemtem agi.