Indian Mujahideen kiralongrar rongnung tongti ka puogo

New Delhi, Tsüklai 14 (Agencies): 2008 küm Batla House nung khatepba nung densema aliba India Mujahideen kiralongrar ana rongnung ka Delhi Police Special Cell-i puogo.
DCP Special Cell, Pramod Singh-i ashiba agi, “Pa ya India nung Mujahideen telok rongnungi ozüng alema kiralongraba maparen balala inyakba tongti rongnung ka liasü aser SIMI den külemi par lokti tanaben asendenshia tenzüktsüba atema sentong liasü.”
Police sangdong ka ajanga ashiba agi, Ariz Khan shiba dang Junaid ta ajar pa Nepal nung apu. Junaid ya Jaipur, Ahmedabad, Uttar Pradesh aser Delhi nung bomb pokdaktsüba nung densema alitsü ta amanger. Pa Nepal arrtsü nung apuba sülen anogo pezü tejakdang Delhi-i anir aruogo.
“Junaid ya linük nung tesem balala nung bomb pokdaktsüba keno nung aija aputsü asoshi bushia liasü. Pa Karol Bagh, Connaught Place aser Delhi, Greater Kailash blasts nung densema liasü. Batla House nung bomb pokdaktsüba sülena pa India nung ita ka shi lia liasü. Pa ya 2007 küm UP blasts, 2008 Jaipur serial blasts, 2008 Ahmedabad blasts nung sendaka aliba atema bushia liasü aser iba sülen Batla House nung khatepba nungia jenbua liasü,” ta Singh-i ashi.
Paisa ashiba agi, “Junaid ya bomb pokdaktsüba aika nung densema liasü aser iba ajanga nisung 165 bo tepsetogo aser nisung 535 yirutsüogo.”
Arishi küm 32 tain kiralongrar ya Batla House amakba nunga tangar pezü den densema liasü aser 2008 Rongjui (September) 19 nü Delhi Jamia Nagar nung khatepdanga densema liasü saka pa police temi mepushi jena oadok. Iba khatepba nung Indian Mujahideen kiralongrar ana tashi khaset.
Junaid ya Shehzad den jena ao, shiba mapang tatsüka lir apu aser obendangdak ka ajanga taküm tepeyong tepuokdak ayutsüba atema obendang agütsü. Trial court ajanga obendang agütsüba anema pai high court nung ken o benoka aliba tang tashi obendang magütsüi bangdaka lir.
Encounter specialist & Inspector Mohan Chand Sharma, shiba-i police tem anir liasü paa 2008 kiralongrartem den khatepba mapang nung khaset.
Rasemnü Singh-i ashiba agi, “Junaid apurnem sen lakh 20 agütsütsüba atema tenangzükba agüja lir. Pa bomb yanglur mongin ka lir aser Indian Mujahideen nung tongtiba lir.”