Indira-i secular atema rara, la tamangba yimsü ka dang liasü: Sonia

New Delhi, November 19 (Agencies): Taoba mapang Ato kilonser, Indira Gandhi asoba anogomong nung Congress Tir, Sonia Gandhi-i, tamangba yimsü ka dang lir, ta amanga inyaker Ato kilonserji Indira Gandhi dang liasü, la atema linük nung India nunger ajakji kasa chirtem liasü, ta ashi.
Congress Tirisa, Indira Gandhi ya takotet lenir rongnung ka liasü, kechiyong lai secularism atema rara aser tamangba yimsü den kinkidong nung ajemdaker telemsa adokdaktsüba anema rara, ta ashi.
Asür, Indira aliba ki 1, Safdarjung Road nung sentong ka nung jembidang Sonia Gandhi-i, “Ato kilonser ka ama, la atema tamangba yimsü ka dang liasü,” ta ashi.
“Lai secularism atema rara aser tamangba yimsü den kinkidong nung ajemdaker telemsa adokdaktsürtem anema rara. Lai India nunger takar sobaliba, democracy aser secular sentsüwangshidaktsü,” ta laisa ashi.
Congress lenir Sonia den taoba Tir, Pranab Mukherjee aser taoba Ato kilonser, Manmohan Singh nata iba sentong nung dena liasü.
Sonia-isa, Indira Gandhi-i sensakertem aser tashimaitertem atema aser parnok rongsenkettsüng jenjang atema inyak, ta ashi.
Sonia Gandhi-isa, linük anitsü atema Indira Gandhi nem küm 16 agütsü, aser iba mapang nung lai sensak tia, rara aser kiralongra densema tayongzükba aika ajuru, ta ashi.
Lai item tayongzükba anema tasüitta rara aser India linük tashitait akümtsü atema kanga nendaka inyak; linük nüburtemi la dak tamang kaa la nungitba ajanga item tayongzükba aika koktet, ta laisa ashi.
Kasa sentong nung Manmohan Singh-i Indira Gandhi indang kaket ka sayaja liasü. Iba anogomong nungsa Indira Gandhi Memorial Trust-i ayongzüka taoba Ato kilonser, Indira nüngtem nung ‘A Life of Courage’ exhibition sentong ka ayongzüka agi.
Indira Gandhi ya linük nung tetsürtem rongnungi mezüngbuba Ato kilonser liasü. 1917 küm November 19 nü la Uttar Pradesh kübok Allahabad yimti nung soa liasü.