Indus Water Treaty ken o telemtetba ka dangi maru: World Bank

New Delhi/Washington, September 16 (Agencies): India aser Pakistan na tsüngda Indus Water Treaty ken o jembiba nung tangatettep ka dangi maru, ta tanü World Bank-i metetdaktsü; ajisüaka iba ken o tajungtiba nung latettsü atema linük anaprongla den maneni inyaktsü, ta parnokisa metetdaktsü.
World Bank-i sangdong ka ajanga, “Senden mena ken o jembiaka tatembang telemtetba ka dang maru aser iba onük tajungtiba nung latettsü atema World Bank-i maneni linük anaprongla den inyaktsü,” ta metetdaktsü.
Indus Waters Treaty (IWT) kübok Kishenganga aser Ratle hydroelectric power dak sendakba onük nung linük ana tsüngda Secretary-level senden amenba sülen World Bank-i, “Linük anaprong den World Bank-i keno jembiba agi melung asür aser maneni iba tezüngzüktep ayutsü atema bangjemer,” ta metetdaktsü.
September 14-15 anogotem nung World bank headquarters nung iba senden mena liasü.
Kasa sangdong ajanga, “World Bank-i iba tezüngzüktep kübok tajungtiba agi inyaktsü aser maneni linük anaprong den amalitepa inyaktsü,” ta metetdaktsü.
World Bank-i yaria India aser Pakistan na tsüngda küm 9 tashi ken o jembia aruba sülen 1960 küm IWT tezüngzüktep ya agia liasü.
Anogo ananü ken o jembiba nung India nungi Union Water Resources Secretary, Amarjit Singh leniba nung Ministry of External Affairs, Power, Indus Water Commissioner aser Central Water Commission nungi teshimtet telok kati shilem agia liasü.
Ano Pakistan nungia Secretary Water Resources Division, Arif Ahmed Khan leniba nung Water & Power Secretary, Yousuf Naseem Khokhar, High Commissioner of Indus Waters Treaty, Mirza Asif Baig aser Joint Secretary of Water, Syed Mehar Ali Shah nungeri shilem agi.