Inesta Barca nungi dang asayadaktsüner: Ernesto Valverde

Tsükali 17, 2018 (Agencies): Barcelona coach Ernesto Valverde-i Andres Iniesta Barcelona nungi dang asayatsü imlaba lemsatepa liasü. Osang ka ajanga ashiba agi, iba season tembangba sülen Barca captain ya China-i aotsü akok.
“Ni osang kaket ajak nung adokba osang ajak nungbo telangzüba magütsütettsü. Onoki Andres Barca nungi dang asayadaktsüner,” ta Valverde-i Rogonü osangbenertem den sensaksemba mapang nung ashi
Barcelona daily Sport osang ka ajanga Rogonü ashiba agi, arishi küm 33 tain Iniesta Chinese Super League nung Tianjin Quanjian nungi asayatsüba atema offer agütsüogo, aser pa nem season shia euro million 35 ($43.5 million) agütsütsü.
2010 World Cup final nung takok goal agütsüsang Iniesta-i taoba küm Mongputeni (October) nung Barca den “lifetime contract” ka sign süogo.
Ajisüaka pa iba küm metsüremi nung küm 34 ajungtsü aser Barca puri taoba ita Liverpool nungi Philippe Coutinho alizükba ajanga pa medeni tarutsü atema sentong yangluba sayur.
Javier Mascherano-i Aenjeti tatemlen Barca toktsür China nunger club Hebei China Fortune nung oa denogo.
Anüdoklen nungi asayartem nem senotsü aika agüja mesüba atema shisabulur mebulur, ta asüngdang dang Valverde-i ashiba agi, “tang tashi nungbo Mascherano dang oa lir aser ni iba amala tebilemba ajanga matalok tsüngda minprong mesüdaktsütsü.”
Barca pur Ipurua nung Eibar den asayatsüba aser iba sülen taruba Sangtennü Champions League nung Chelsea den asayatsü.