Iran’er nuclear senden maneni amentsüsa akümer: EU

Saudi Arabia-i aniba teloktep Arab mitkartemi par tayimtsütem amshia Sanaa yimtiba amakba sülen Yemen sorkar anemer telok, Houthi pusemba mitkar commander ka, Brigadier Khaled al-Anduli’er ki kanga mejungi poksar aliba noksa nung angur. (Sanaa, July 07)

Vienna, July 07 (Agencies): Alima tashi abenba linük lenirtemi Iran den otsüsütsüsa nuclear tezüngzüktep agiba jakdang Iran’er lenirtem den maneni senden mena mangatettep ken o kar bentettsüsa akümba osang ka European Union (EU) foreign policy lenila, Federica Mogherini-i tanü Mongolbar nü metetdaktsüogo.

“Britain, China, France, Russia aser United States den külemi, Germany densema P5+1 ta ajaba telok o Iran nati tarutsü anogo ishika jembitepba senden amentsüsa akümer. Ajisüaka, senden amenba ajanga Iran den nuclear tezüngzüktep agitsü asoshi renemba anogo tali atsünglangshir ta alimai mangatettetsüla,” ta lai ashi.

Alima tashi abenba linüktemi Iran anema benokba tenokdangba sentongtem agientsü melena par linüki tenzüka aliba nuclear sentong taruba küm 10 shi anentsü tezüngzüktep agitsü asoshi tang Vienna nung senden temendakpurtemi kanga meranga inyakba osang bushiteta lir.

P5+1 telok aser Iran na tsüngda tangasa ken o kar mebentetteti aliba yong par telok ana tsüngda nuclear tezüngzüktepji tatem küma magiteti lir ta lai shisem.

Parnoki taoba June ita 30 nü tashi nung nuclear tezüngzüktepji agitsü alizüng yua liasü saka par mangatettep ken o mebentetba yong iba anogoji atsünglangshitsüa aküm.

Aji oda, tang senden temendakpurtemi nuclear tezüngzüktepji tan Hokolbar nü tashi nungbo agitsü teimla tulu ayuba osanga angazükogo.

“Alizüng ayuba anogo nung tezüngzüktep agiba denbo ajak nem tajangzük bener arutsütsüsa tezüngzüktep tajung agitsüji tajungba ta tangatetba tulu yur onoki Iran den senden temendak lir,” ta US otongdar, Marie Harf-ia tanü metetdaktsüogo.