ISIL teloki Dier Az Zor refugee aser Kurds nunger aika tepset

Abu Fas, October 13 (Agencies): Northeastern Syria nung ISIL teloki gari nung bomb inoker pokdaktsüba lendong nung Syrian refugee aser Kurdish mitkartem aika tepset, ta osang balala ajanga ashi.
Iba lendong ya Deir Az Zor aser Hasakah province arrtsü anasa Abu Fas tesem nung Brehostibarnü adalok aser iba lendong nung refugee aser Kurdish Asayish mitkartem taküm sama, ta Syrian Observatory for Human Rights (SOHR) ajanga ashi.
ISIL (Islamic State of Iraq & Levant) telok ya Syria aser Iraq nung kanga ajema kümdagi aser parnok ya tang bo Deir Az Zor southeast tsütsü aliba Euphrates lenden nung aliba jila aser yimtsüngtem nung jenokba mapang lir.
US-i yaria Syrian Democratic Forces (SDF), Kurdish tembartem aser Arab mitkartemi north tsütsü nungi amaker aser Syria army den Iraq aser Russia mitkartemi yarisema anülulen tsütsü nungi item ISIL telok den rara arudagi.
Deir Az Zor tesem nungi arua aliba nüburtem dak tenük yoker gari nung bomb inoker Hasakah south tsütsü aliba Abu Fas nung pokdaktsü, ta SDF odongtar Talal Sello-i ashi.
“Iba lendong nung nisung aika asü. Iba gari nung aliba bomb ya apokba sülen civilian tem ya lisem aliba tesem tsütsüi jena ao aser iba tesem nung mine rema aliba poka taküm samar aser yirur timba aküm,” ta pai osangbener dang ashi.
Hasakah province aser Hasakah jila tuluba ka Kurdish autonomous sorkar kübok lir aser tesem tilaba ka central sorkar kübok lir.
Syria nung rara adokba ajanga nisungtem tesem balalai jenshia aoba ya Kurdish ketdangsertemi Abu Fas nung anidener aser iba sülen atsükokdaktsüba tesemi anir aor, ta SOHR ajanga ashi.
Deir Az Zor kübok Mayadeen jila nung tesem pezü sorkar indang mitkartemi tanaben agitetogo, ta SOHR ajanga Brehostibarnü sangdonga liasü.
Mayadeen-i mitkartem tanaben iogo, ta state news agency SANA ajanga ashi.
Taoba hopta Mayadeen jila-i Syria mitkartem aiba sülen anogo ana lir ISIL/ISIS temi item mitkartem ya meindokteta liasü.
Mayadeen ya Deir Az Zor nung ISIL indang mitkartem yimtiba ama lir, ta Syria mitkar osang ajanga ashi.
Syria nung aliba telungpurtem Cairo nung senden amenba sülen southern Damascus tsütsü yimjung nung alitsü asoshi Brehostibarnü lemtetogo, ta Egypt sorkar indang sangdong ka ajanga ashi.
Iba yimjung tezüngzüktep agiba nung tanga linük nungi Damascus-i aittsü asoshi lenmang lapokba aser Eastern Ghouta district nungi nüburtem tesem balalai meindokba anentsü molungtep, ta Egypt sorkar indang Al Ahram osangkaket ajanga ashi.
Eastern Ghouta amakba anendakja yimjung nung alitsü asoshi jembia aser iba region nung tajemzük tia nung aliba aser timtem nung aliba nüburtem nem teyari peria agütsütsü asoshi Egypt-i nangzükogo, ta Jaish al-Islam telok nungi tekolakba Mohamed Alloush-i ashi.
Damascus anasa aliba Eastern Ghouta tesem ya Tir Bashar al-Assad indang mitkartem den rarar atema tesep tulu rongnung tatembangba lir aser iba kasa tesem nung August 2013 küm chemical amshia amakdang nisung noklang aika taküm sama.

You must be logged in to post a comment Login