ISIS busemer India tsür ka Singapore nung apu

Singapore, November 09 (Agencies): International Security Act (ISA) kübok Islamic State aser kiralongrapa mapa busemer Singapore nunger asem pua aliba rongnung India tsür ka densema lir, ta ketdangser ajanga ashi.
Par asem rongnung arishi küm 19 tain Adzrul Azizi nem Restriction Order agütsüogo aser arishi küm 25 tain Abu Thalha bin Samad aser arishi küm 38 tain Munavar Baig Amina Begam na nem Detention Order agütsü, ta Ministry of Home Affairs ajanga sangdong ka nung ashi.
Amina ya kicha meinyaker tanur tetsü ka lir aser India nungi Singapore Citizen agir alir, aser la ya ISIS busemer aser ISIS nung adentsü asoshi raraba tesemi aotsü meranga liasü, ta ministry ajanga ashi.
La ya bendanger online contact ka ajanga kiralongrar telok indang otsü tejangja ashi aser iba telok ajanga la den IS indang material tem lemsatepa ISIS ya Sunni nunger atema conflict zone nung rarar, ta amangdaktsü, ta osang ajanga ashi.
“La ya kanga junga puadaktsüba ajanga lai military training agitsü renema liasü aser ISIS temi la jara Middle-East nung ISIS atema raratsü melunga liasü,” ta kasa sangdong ajanga ashi.
Lai kiralongraba ajungketa social media nung material balala lemsatepa liasü. November ita la nem küm ana asoshi Detention Order agütsü.
Tebur ana rongnung Abu Thalha ya kiralongraba telok, Jamaah Islamiyah (JI) nung züngsem ka, ta bushitet.
Pa ya JI den sendaktepa aliba kaket reju ka nung zünga intet aser pa azüngba kaket reju kar nung paramilitary training agia lir.
“2014 küm pai JI totuyuba nung anidaktsü asoshi tenangzükba agi aser JI nung züngsem ka akü. JI lenirtemi pa dang kechi mapa inyaktsü nungloktsüdir inyaktsü renema liasü aser pai JI atema pa taküm bendanga agütsütsü melunga liasü,” ta ministry ajanga ashi.
2016 küm nungi Abu Thalha ya JI den sendaktepa aliba kaket reju ka nung tesayur mapa inyaka liasü aser iba kiralongrar telok nung züngsem kümdaktsütsü asoshi kaketshirtem bushiba committee ka nunga inyakdanga lir.
“Abu Thalha Singapore nung ketdangser nem agütsütsü asoshi onoki regional sorkar den külemi August 2017 nung maparen balala inyak aser iba ya pai kiralongrar telok den shilem agiba ajanga ISA temzüng kübok apu. Pa nem Order of Detention ya küm ana asoshi September 2017 nung agütsü,” ta ministry ajanga ashi.
Adzrul ya taoba mapang National Serviceman ka liasü aser SAF nung Logistic Assistant ka ama inyaka liasü, aser pa ya Iraq aser Syria nung aliba kiralongrar telok, Islamic State busemer ka lir, ta ashi.
“2016 küm tiyong nung Adzrul-i Syria nung ISIS atema raratsü merang aser iba linük nung raraba ya Sunnis aser Shias atema rarar ama pai ajitet. August 2017 nungi pai ISIS inyaksangshi aser azüdokshiba nung temulung melemi aküm,” ta ministry ajanga ashi.
Adzrul ya counselling agitsü aser iba nung tamangba yimsü indang counselling densema agitsü, ta osang ajanga ashi.

You must be logged in to post a comment Login