ISL auction: Sunil o Eugeneson nati sen timba aazükogo

New Delhi, July 10 (Agencies): India national football captain, Sunil Chhetri aser külem Bengaluru FC asayar, Eugeneson Lyngdoh nati yashi Hokolbar nü Mumbai nung agiba Indian Leagu Super League (ISL) auction sentong nung sen timba aazükogo.
Mumbai City FC teloki par telok tenüng nung 2 buba ISL asayamong nung shilem agidaktsütsü asoshi Sunil nübo sen crore 1.20 agi alizüka liasü.
AIFF Player of the Year sempet 4 ben tashi agizüksang aser India asayar rong nung goal timba agütsüsang, arishi küm 30 tain Sunil nübo alizüktsü asoshi tetenzükba sen jenjang sen lakh 80 atazükja liasü.
Bengaluru FC midfielder Eugeneson Lyngdoh nübo alizüktsü asoshi tetenzükba sen lakh 27 atazüktsü aser Pune FC teloki pa nübo sen crore 1.05 agi alizük.
Yashi nübo alizükba India nunger football asayar 10 rong nung Sunil aser Eugeneson na nübo dang sen crore dak tema agüja alizüka liasü.
ISL defending champions, Atletico de Kolkata teloki India defender Riono Anto nüboa sen lakh 90 agi alizükba osang jangjaogo.
Ajak agi sen crore 7.22 tashi endoka India asayar 10 indang nüboji alizükba osanga jangjaogo.
Ajisüaka, yashi sentong nung FC Goa aser Kerala Blasters telok natibo asayar nübo ka danga malizüki oda süidaktsüogo.
Asayar 3-ji dakalaka, Delhi Dynamos FC-i sen lakh 41 agi Pune midfielder Anas Edathodika; Pune FC-i sen lakh 45 agi Jackichand Singh; Chennaiyin FC-i sen lakh 86 agi Thoi Singh; Atletico de Kolkata-i sen lakh 68 agi Arata Izumi; Delhi Dynamos-i sen lakh 51 agi Robin Singh; Chennaiyin FC-i sen lakh 60 agi Karanjit Singh aser North East United-i sen lakh 56 agi Seityasen Singh nunger nübo alizükba osanga jangjogo.
Tan nübo alizükba asayar 10-i ISL tenzükba küm, 2014 küm ISL nung shilem magitettsüsa akümba yong parnok nübo ya taküm 2015 küm ang auction sentong ajanga alizüker lir.
2015 ISL asayamong taküm October ita 3 nü nungi tenzüka December ita 6 nü tashi asayatsü ayongogo.