Islamic State-i Syria, Raqqa nung internet nokdanger

Beirut, July 20 (Agencies): Islamic State (IS) kiralongrar teloki Syria, Raqqa nung internet amshitsü nokdangogo, aser ibaji ajanga yangji aliba nübur aser par sepaitemi dena internet cafes nung ang internet amshitsüsa akümer.

Syrian Observatory for Human Rights aser activist telok ‘Raqa is Being Slaughtered Silently’ napronglai internet nokdangba osangji metetdaktsüogo.

Activist group Raga-i internet service agütsürtem amokmerena nija wifi internet connection anentsü asoshi metetdakja yimti nung shidi tila ka prokba osang online nung adoktsüogo.

“Iba ya internet service agütsür ajak asoshi teinyaktsü ka lir: Islamic State sepaitem densema internet café aser nija connection dak alaka wifi connection ajak agientsüla.”

Deobar anogo nungi tenzüka anogo pezü tsüngda iba tetuyuba nung shia aliba mapa inyaktsüla, ta parnokisa ashi.

Iba tenokdangba ajanga yimti nung IS-i makmakshimak adoktaktsüba kuli kaket nung bendener activist telok ‘Raqa is Being Slaughtered Silently’ dang masü saka telok (IS)-a kongshitsü, ta Syrian Observatory for Human Rights-i ashi.

“Iba mera ya, Raqqa yimti telung nung atalokbatem meimbangtsü asoshi inyakba lir,” ta Britain nung amenoka aliba telokisa ashi.

Damascus, Euphrates Valley northeast nung aliba Raqqa ya IS telok asoshi Syria yimtiba lir, aser parnok kübok Syria aser kidanger linük Iraq litsü tulu ka lir.

You must be logged in to post a comment Login