Israel Ato kilonser, Benjamin Netanyahu par linüki meyipa ogo

New Delhi, Aenjeti 19 (Agencies): Israel Ato kilonser, Benjamin Netanyahu-i anogo troknü tashi India semdanga liasü aser tanü pa par linüki meyipa ogo.
Aenjeti 14, 2018 nü Ato kilonser, Narendra Modi-i Netanyahu agizüka liasü, iba sülen pai External Affairs Minister, Sushma Swaraj ajurua linük ana tensendaktep dak sendakba onük aika nung o lemtepa liasü.
New Delhi nung Ato kilonser, Modi aser Israel Ato kilonser, Benjamin Netanyahu na leniba nung ketdangsertem senden ka amenba sülen linük anati tezüngzüktep teku agiogo.
Iba sülen Aenjeti 16, 2018 nü Nethanyahu aser Modi nati India-Israel Business Summit nung jembia liasü.
Brihostibarnü Netanyahu-i 26/11 Mumbai kiralongrartemi amakba lendong nungi kümzüksang, Moshe Holtzberg ajuru. 2008 küm kiralongrartemi Mumbai amakba mapang nung Holtzberg’er tsürabur anaprong süadok.
Aenjeti 17, 2018 nü Ato kilonser Modi aser Israel Ato kilonser, Netanyahu den pa kinüngtsü, Sera nungeri Ahmedabad yimti nung mega road show nung shilem agiba sülen Mahatma Gandhi nem akhüm agüja liasü.
Tang tashi nung Israel Ato kilonser anati dang India semdangogo; 2003 küm Ato kilonser, Ariel Sharon-i India semdanga liasü aser tanabuba Ato kilonserji Nethanyahu asütsü.
Yaküm July ita nung India Ato kilonser, Modi-ia Israel semdanga liasü, aser ibaji India nunger Ato kilonser kati Israel semdangba mezüngbuba asütsü.