Istanbul nung tentetba US Consulate & Police station amak: 3 asü

Tanü Hombar nü Turkey kübok Istanbul nung tentetba police station kidang bomb pokdakja lendong atalokba sülen Turkey forensic polie ketdangsertemi lendong atalokdak bushisüngdang maparen inyakba noksa nung angur. (Istanbul, August 10)

 Ankara, August 10 (Agencies): Tetsür kiralongrar anati Turkey kübok Istanbul nung tentetba US Consulate ki tanü Hombar nü amakba osang jangjaogo ta police-i metetdaktsü.

“Tetsürla anati Consulate ki amakba yong police ketdangsertemi tena den injang yoka raratsü tenzük aser indangji amakla anaji jena ao,” ta parnoki ashi.

Tesülen, police ketdangsertemi tanü amaker rong nung ka anasa ki ka telung nung atsüka lia apu aser tang la mozükidang yua lir ta Turkey sorkari ketdang asüba Anadolu Agency osangi metetdaktsü.

“Tang pua alilaji arishi küm 42 tain Hatice Asik ta jangjaogo aser la Revolutionary People’s Liberation Army-Front (DHKP-C) züngsem aliba osang bushitetogo” ta osangi ashi.

Tanü amaker tanabuba tetsürla aputsü asoshi police-i nungdakba maparen tenzüka aliba osang ka Istanbul governor office-ia metetdaktsü.

DHKP-C teloki taoba mapang, 2013 nunga Turkey kübok Ankara nung tentetba US Embassy ki amakdang Turkey nunger security guard ka tepsetba osang bushiteta lir.

Ajisüaka, tanü Consulate ki amakdang nisung asüba lendongbo majuru ta osangi metetdaktsü.

Ano külen, mejangjatetba prangpong abener telok kati Istanbul nungsa tentetba police station tanü amakba osang jangjaogo.

Tanü amakertemi bomb pokdakja police station nung lendong atalokdaktsüba ajanga police ketdangser 5 aser anasa alir nübur 2 tashi yirutsüba osang jangjaogo ta police-i metetdaktsü.

Tesülen, police aser amakertem na tsüngda injang yoka raradang police ketdangser 1 aser amaker 2 densema parnok 3 tashi kaset ta police-isa ashi.

Ajisüaka , US Consulate ki aser police station amakba lendong naji sentaktepa ali asü mali iba osangbo tang tashi mejangateti lir ta parnoki shisem.