Ita ana tsüngda Rohingya nunger jena aoertem 100 dak tema süogo

November 18, 2017 (Agencies): Rohingya refugees tem Myanmar nungi Bangladesh-i jena aoba mapang parnok 100 dak tema rong raksaba aser meküpokba lendong nung dena süogo, ta UN ketdangser kati ashi.
Chief UN spokesman Stephane Dujarric-i Hokolbarnü ashiba agi, UN Refugee Agency (UNHCR) dangi Rohingya refugees tem parnok 1000 dak tema rong 30 shi nung mener Myanmar nungi Bangladeshi atongba osang aruogo, ta osang ka ajanga metetdaktsü.
Bangladeshi-i aitsü asoshi sen magütsütetba ajanga refugee tem parnoki bena arutetba oset ajak agi rong yanglur Naf ayong nung Myanmar nungi Bangladesh tashi jajar, ta otongdarisa ashi.
Tawa Bangladesh atongertemi UNHCR dang ashiba agi, parnok Myanmar tsüküm nung ita ka dak tali kanga tepetzük jenjang nung ataogo, ta Dujarric-i metetdaktsü.
Coordination of Humanitarian Affairs (OCHA) atema UN ketdangsertemi ashiba agi, August 25 nü nungi tenzüka tang tashi nung Rohingya refugees tem parnok 620,000 shi Myanmar doktsür Bangladeshi-i jena ogo.
“Item refugee tem ya khen atema ki yanglur lidar aser, parnok infrastructure mesera services teperi mali,” ta Dujarric-i ashi.
Rohingya Refugee Crisis Response Plan puri sen million $140 tera mejungi agizükogo, aser iba ya parnok teyari atema nüngdakba shilem asem nung ka kübokang lir, ta Dujarric-i tuteta sayu. Pai tenla agütsürtem dang fund tem tekaritiba nung lemtsütsü asoshi mepishi.

You must be logged in to post a comment Login