Ita asem tsüngda sorkar school tem nung CCTV inoktsü: Kejriwal

New Delhi, Aenjeti 18 (Agencies): Tanü AAP tongti lenir aser Delhi Chief Minister, Arvind Kejriwal-i ketdangsertem dang ita asem tsüngda Delhi nung aliba sorkar school tem class takdang ajak nung CCTV camera inoktsü atema tetuyuba agütsüogo.
Iba dak sendakba nung pai, ibaji ajanga tsüraburtemi pei tanurtem school nung koma angazüker ibaji reprangtettsü, ta ashi.
School tem nung CCTV camera inoktsü atema project ji Kejriwal den Deputy Chief Minister, Manish Sisodia, PWD minister Satyendar Jain, chief secretary Anshu Prakash aser tanga sorkar ketdangsertemi asadanga liasü.
“Tsüraburtemi pei chirnurtem school nung angazükbayim mobile phone ajanga reprangtettsü. Ibaji ajanga inyakyim teladak asütsü aser melenshitsü, iba den külemi tanurtem kümzüka alitsü,” ta Kejriwal-i metetdaktsü.