Italy nung Africa nungi arur pezü injang agi yirutsü

Rome, Tsüklai 03 (Agencies) : Tanü Honibarnü Italy lima Macerata yimti nung nisung kati tapi agi dang oliorartem dak injang kaloktsü aser iba mapang Africa nungi arur nisung pezü yirutsüogo.
Osang ajanga ashiba agi, ibaji tangar kin nübur anema apusotsü tebilemba nung inyakba maparen asütsü südi ta bilemdagi. Iba osang angashili Rome yimti nungi anüdoklen tsütsü mile 125 shi pilar aliba Macerata yimti nung mayor-i nüburtem dang ki telung nung dang alitsü ayongzüka metetdaktsü.
“Osang tejangja memetetdaktsü tashi ki telung nung dang liang. Nisung ka prangpong amer gari tila ka nung senzüdar aser pai yimti nung nüburtem dak injang kaloktsür,” ta Mayor Romano Carancini-i Facebook ajanga sangdong.
Arishi küm 18 Italy tsür ka alangsar suitcase ana nung mima aliba ngutetba sülen anogo ishika dang lir tang iba ya ataloker. La tespetba maparen nung temulung malem bilema Nigeria nungi aruba nisung ka pua lir.
Corriere della Sera ta ajaba osangkaket website nung shia aliba agi, tanep 11 ako meta nisung kai pa mena aliba gari tila ka kichiba nungi Africa nungi aruba nisung ana dak injang kaloktsü aser tena rongnung ka yiru.
Ano tatsüka lir tebur ka aser Africa tsür ka dak injang kaloktsü; tenaji koma yiruar iba osang zülu tashi nung mejangjateti liasü.