Japan-i Sendai Nuclear Reactor tanaben tenzükshir

Japan anülulentip tsütsü Kagoshima prefecture kübok Satsumasendai nung tentetba Sendai Nuclear Power Station nung amshiba reactor No. 1 (Achijilen) aser No. 2 (Abelen) indang noksa ka yangi angur. (Satsumasendai, August 11)

 Tokyo, August 11 (Agencies): Japan nung tentetba tongti power company kati par linük indang nuclear reactor ka tanü Mongolbar nü tanaben tenzükshiogo.

Japan-i taoba mapang, 2011 küm Fukushima lendong ajuruba sülen iba amala lendongtsüdong balala nungi kümzüktsü maparen inyaka arur külen tan mezüngsüa par reactor tanaben mapa inyakdaktsütsü tenzükshir lir.

“Sendai nung tentetba reactor-i tan Hokolbar nü nungi tenzüka light tashi agütsütsü tenzüktsü aser taruba September ita nungi tenzüka taoba mapang ama tashi ajak agüja mapa inyaktsü imlar,” ta Kyushu Electric Power Co.-i metetdaktsü.

Alima aser nüburtem nem lendong bener marutsütsüsüa nungdakba maparen inyaktsü nükjidong nung Japan-i par reactor-tem taoba küm 2 tashi shibanga ayuba osang jangjaogo.

Par nuclear tashi amshia tarutsü mapang, 2030 küm tashi nung electric tashi noklang nung shilem 20 agi timba kümdaktsütsü asoshi Japan sorkari alizüng yua lir.

Ajisüaka, par nuclear reactor shibanga ayuba yong ali telung nungi tutetba mijang aser iba amala osettsüset ajanga dang par linüki electric tashiji ngua liasü.

Ano, taoba mapang lendong kanga sashia bener arutsüba yong Japan nübur timbakati par nuclear reactor tanaben mapa inyakdaktsütsü asoshi memulungi aliba osang angazükogo.

Aji oda, taoba Japan Ato Kilonser, Naoto Kan densma nisung noklang aikati tanü Sendai tesem nung sentepa nuclear reactor tanaben tenzükshiba anema longkak aita par mepelabaren metetdaktsüogo.

“Nuclear reactor amshiba ajanga tarutsü mapang nung kodang lendong ataloktsü ibaji mapang jilia metezütettsü. Ibaji dakalaka, lendong balala nungi kümzüktsü asoshi nungdakba terenemshiba junga magi tan reactor ya tanaben tenzükshir lir,” ta Kan-i tanü sangoktsü.

2011 küm tsunami aser menoknok lendong tesashi atalokba ajanga Fukushima nung tentetba nuclear reactor raksatsü aser iba reactor nungi miim aketba mozützü yimzüka aluba ajanga nübur 100,000 dak temai pei talikdak toktsütsüsüa küma timtem toushi jenti ajurua liasü.