Japan PM amenba tayimtsü nungi yinpak tsük

Tokyo, Jan 12 (Agencies) : Japan ato kilonser, Shinzo Abe anemba tayimtsü ka nungi ‘laptop computer’ tetka yinpak tila shizüka tsük aser iba yinpakji ajanga timtem agütsütsü ama tsübuseta bilem, ta defence force osang ka ajanga metetdaktsü.
Japan Air Self Defence Force (ASDF) nungi otongdar kati ashiba agi, Ato kilonser bendangleni aodang jajaba jetliners ana rongnungi ka, Boeing 747 nungi yinpak samaba indangji Tokyo yimtiba nungi linük anüdoklentip tsütsü Hokkaido ta ajaba asetkong bushia aoba mapang ketdangsertemi meteta aru.
Asadangba nung 38 cm (15 inches) by 20 cm samaba yinpakji kong samara ano menguteti liasü. Kol tilala balala keta aliba yinpakji tashikang tachijilen aliba kol den anasatepa lir.
“Tayimtsü yimketa atudak ibaji maliasü anungji iba yinpak angutsüji kanga tasak asütsü,” ta otongdarisa metetdaktsü.
Paisa ashiba agi, Abe aenlen jajaba tayimtsü nungi komaser ibaji samar kuli tejangja bushitsü atema air force-i maparen tenzüktsü.
Anogo troknü songtema Estonia, Lithuania, Serbia aser Romania densema Eastern Europe sema jajatsü asoshi Abe den sorkar ketdangsetem aser business inyakertem nungi teshimtet purtem Hokolbarnü sorkar tayimtsü tulu ana nung Tokyo yimti nungi apusoa ao.
Yinpak shizüka tsükba tayimtsü 747 nungji Abe jibo mena maliasü ta kasa osang ajanga metetdaktsüogo.

You must be logged in to post a comment Login