Jila nung alir o yimdaklir na Sensaksemer

Yimdaklir : Ohoi, adianu nenok yimdaki arudangang ajurur-ji tanü ya mapang tajung-a, anungji ni teti nenok jila alirtem den lemsatepnüa aliba o ka shidi… Ena, nenok jila nung alirtemi yimdak yimden, Arogo, aser lokti ajunga nung teka amouka maparen ajak nung tebang ia adenba ya onoki maginer ajaa…
Jila alir : Ayaaa… adianu nenoki onok jila nung alirtemi teka amouka maparen ajunga nung tebang aiter amai angateter dang ashi, pei tetsü taso lima shibaibo mejungdaktsüner, aser oda metetsümonga-bo meraksaner, saka jungdaktsünuba agi temulung agi maremtet ajungshiteper dang ako… Nenok mapa nung jangjong-marar amai tangatet niii…
Yimdak alir : Ena tanü putu nung joko mashi-memeteter shinga mali, ajaki tonga meteta tang lir, anungji yimdaklirtemia jila nung alir mapa nung jangjongmara masütsü aser jila nung alirtemia yimtsüng maparen nung mejangjongtsüla ta adiii…
Jila alir : Hau… tanü putu nung shinga mashi-memeteter mali ako, ajisüaka kati ka den ammalitepa shisa aputepa lira tamakoktsü ajak takoktsü akümer, aser kati ka züngoka shisa aputeptsübaji kangasa tongtibang ako. Tanü asen India lima karaa renloka tejakleni aoba ya, India nunger England aser America lima amala alima tulu tashitemeteter lima nung oa senso kümer alirtem nungi teyari aser shisatsü agiba ajanga yamai renloker ako… aser joko jila nung alirtem ya noklang nung shilem 90 pei li pei ki nung alir tesa aser bendanger den kibalembur aika lir, ajiser yimdak timba ka tsürabur süadokmar, anungji aikati yimdaki arutsü memenungrar, aser chirnurtem aikati pei yim tenüng-a mejangja lir-ko. Anungji yimdaklirtemi akokba tashi jila nung alirtem pei yim menungra-a yimdaki arunütsüsa tesendaktep tajung ayutsü bilemangma… Aji oda mesüra yimdaki arunur melii kümadoktsü, aser idangji asen yimkong-sa akoksatsü ta sasaseta bilemer adiii…
Lilir : L. Kika Pongener, Aoyimküm, Dimapur.