J&K nung kiralongrar 5 khaset

New Delhi, November 18 (Agencies): Honibarnü north Kashmir kübok Bandipora district nung kiralongrartem aser sepaitem raradang kiralongrar pongu khaset aser Indian Air Force (IAF) nungi Garud commando kata tepset, ta tanü defence otongdar kati metetdaktsü.
Kiralongrartem aliba osang ka angazükba sülen security sepaitemi iba district kübok Hajin tesem nung Chandergeer yimtsüng longbanger mita ao, aser iba mapang nung kiralongrartem jagi tama sepaitem dak injang khaloktsü, ta police ketdangser kati ashi.
“Hajin nung tang teraradak mapang kiralongrar pongu tepsetogo,” ta Srinagar nung amenoka aliba Defence otongdar, Col Rajesh Kalia-i ashi.
Kasa rara nung IAF Garud commando kata tepset aser Army kata yiruogo, ta paisa metetdaktsü.
Garud Commando Force sangji IAF nung special forces unit nungi liasü.
Kiralongrartem den teraradak lir aser maneni osangoladar, ta paisa shisem.