Joko yabo melenshiang

~ I. Meren Lemtur, Kendriya Vidyalaya, Tuli.

Küm shia munga aruba tesayurtem anogo ya kanga dang tongtipang anogo rungnung ka lir.
Aser akhi mapang nungi tanü tashi munga arudagi aser akhi mapang nung alima kangabo tejakleni maoba mapang aser rongsen angulena yamaji sadema maliba ajanga tesayurtem anogo nüngtem nung school tanurtem ki sema mesüra lemjem nung naro kalokja sen bendena iba jagi benjung achayanga aru aser school tanurtemia yamaji tashi anga inyaka aru.
Saka tanübo asenok putu tasen ka nung alima nüburtema temetetba nunga melenshia aoer,aser tanurtema yamaji ajak nung rajema angateta aoer. Saka tanü tashi asenoki memelenshitetba kaji tesayurtem anogo nüngtem nung school tanurtem auso, molok amer ki ajak sema aser lemjem ajak nokdanga yimdong ajak sema sen sarua meshimetsüa senzüdaktsür, anepdang pongubaji nung kishi akoshir, shiba ta sür ki lapoka alu nung school tanurtem school uniform agir kishizüng nung tejak ajak meremzüker shibaang tama asütsü ta nungteba nokdaktepa atar. Tanur kati teachers’ day atongtsü anogo eshika lia yamai ashi. Taküma teachers day atongerji meshimetsüa aotsü tezüdanga bilemer ta ashi. Asenoki ya angatetdi, tanü putu nung tsüraburi pei kidang asen chirtem kecha nunga timmetemdaktsü lidaktsür, saka tesayurtem anogo nüngtem nung asen chirtem yimti yimdong aser ki ajak sema tesayurtemi meshimetsüa senzüdaktsüba ya kangarabo tanurtem asoshi tepelatsü mapa masü. Ano, tesayurtemia ya khen shisadangdaktsünür, asenok tesayurtem anogo nüngtem nung asen student-tem meshimetsüa senzüdaktsüba ya parnoki jangraseta aser inyaknüseta inyakera ta mebilemli, saka iba mapa inyaktsüba ya nungnangseta, mounüseti tesayurtemi ozüng ama to inyaktsüsa ta asüba agi minyaknüyonga inyaktsüsa asüba agi dang inyaker ta angatetdi. Oda akok ka asünungbo, tesayurtemiang tanü putu nung ya pei ket nungi rongsen terara tsüktepber school nung timtemer tanur kar mesüra nüburtem asoshi tesayurtem anogo nüngtem nung inyakra ajiang ano tali tesayurtem anogoji meraket anogo ka asütsü masü no!
Anungji, joko iba ama tesayurtem anogomong nüngtem nung tanurtem sapisarua jajadaktsüba mapa yabo tanurtem tsüraburtemia school den angatetteba nokdangtsüla, aser school nung administration ajangaka nokdangtsüla ta nibo bilemer. Alima nung ajak dang tenüng tulutiba aser asen iba alima nung meliaka teti asen mapa mesamai alitsüba tenüngji tesayur(Teacher) tenüngba ya lir.Anungji temeim külem tesayurtem dang ni ya ayongzüker, asenoki asen anogo amongba tenüng nung mapa tajung kar inyaktetra küm aser anogotemji kodangang atongtsü ta yongyaseta ataa alitsüsa tesayurtem anogoji alima dang meshimetsüba anogo ka masü, saka temoatsütem lemsatepba meraket anogo ka südaktsüdi ta aria bilemba iba olemsapang ajanga lemsatepber.

You must be logged in to post a comment Login