July 21 nungi Parliament senden tenzüktsü

New Delhi, July 08 (Agencies): July 21 nü Parliament senden tenzüktsü aser August 13 nü tembangtsü; iba mapang nung opposition party temi Vyapam ochimashi ken o, ‘Lalitgate’, black money aser socio economic caste census (SECC) ken o densema onük aika nung sorkar anema jembitsü imlar aser iba asoshi sorkar renemdagi.

July 20 nü party ajak senden ayonga amentsü sentong lir.

Sorkar osang ka ajanga ashiba agi, June 24 nü Cabinet Committee on Parliamentary Affairs senden amenba mapang, taruba Parliament senden nung mangatettep ken otem anema raratsü bangjemogo, aser senden methineni katetettsü asoshi lemtepogo.

Kasa osang ajanga ashiba agi, iba senden nung Land Bill benoka mejembitsüa akok, kechiyong RSS aser teloktep party temi Land bill nung telatetba aika ashishir.

Home Minister Rajnath Singh-i NDA sorkar nung minister tem akhanga pusemtsü asoshi jembia lir. Sorkari pusemtsü bangjema aliba minister tem rongnung External Affairs Minister Sushma Swaraj, Madhya Pradesh Chief Minister Shivraj Singh Chouhan aser Chhattisgarh Chief Minister Raman Singh nunger densema lir, ta osang ajanga ashi.

Vyapam ken o dak sentakba nung opposition-i aitsüba nungi jenbutsü asoshi MP chief minister Chouhan-i iba ken o ya CBI nem bushisüngdaktsütsü asoshi Supereme Court dang mepishitsü, ta sangdongogo.