Jungjunga raksatetogo !

Election nung meyariba agi election temer Government school nung tesayur tajung ka talangkati transfer yok, anungji school-ji mejungi akümtsü tenzük aser election nung meyariba atema tesayurtem transfer odaktsübaji temerenshi agütsüba sobaliba ka küma adok. Nagaland nung government school-tem mejungi akümba deraji ibaji lir. Ano külen, government tenzüker ka küm agia mabensa aser mapa nunga majung aser makoker saka election mapang nung yariba atema tepelaba tamaitsü promotion agütsü. Nagaland government nung mapa koka inyakertem tezüdang aludaktsüba aser government inyakyim meshitaki aküm tenzükba anogoji ibaji liasü. Mapabo maka aser senotsüa mali saka pei nisung aser kinunger apia mapa meinyak ser ita sen chia alitsü atema government mapa nung aniokba anogoji Nagaland timtemtsü tenzükba anogo liasü. Government mapa atema among adena mao saka Travelling Allowance yanglua agitsü tenzükba anogoji Nagaland government nung ochimashi inyaktsü tenzükba anogo liasü. Iba amaji pei lima memeim aser Tsüngrem aküm metsübui tim masüba mapa tilala inyak tenzükba sülenbo joko mapa meinyak ser tiyazü bill agizüka achitsüa kecha marendaki aküm. Iba amaji Tsüngrema mali aser ozünga maka ama tiyazü mapa aser tiyazü nisung tenüng nung senotsü, jangotsü aser osettsüset kecha tarendak maka  meshitak agi shitak küma inyaktsü tenzükba anogotemji Nagaland junga meyangludangyongi teraksa tenzükba mapang liasü. Iba denji ano election nung akoktsü mechi khen khen tashiyim aser khen khen senotsü amshia tenzükba mapangji Nagaland yimten AK 47 aser sen agi alia telongi yoktsü tenzükba anogotem liasü. Iba ama yimten ka yangluteta yur tang asenok kangshir. Nagaland tenüng nung yimsüsür akümer aser Nagaland government tenüng nung ita sen aser teyari zünger mezüngma agir, ajisüaka Nagaland ajungtsü atema yimten nung ochi ken o süoka jembiba anogo maka aser Nagaland ajungtsü atema langka tajung ochishia inyakba mali, nisung ajak Nagaland dak dang meseper aser wazüker dang akümba agi tanü Nagaland lasasa menokdakteti kümogo. Nagaland nung yimsüsür aser government tenzüker kümnübaji nübortem tenzüktsü asoshi masü saka nübortem tenüng nung rongsen bendena pei kija takar akümtsü asoshi aküm ama nisung aikati nübortem mezüngmeshia inyaker. Aji oda, tanübo asenok aikati Tsüngrem mapa dena ochimashiba sen agi inyaker. Nisung aikati ochimashiba sen agi missionary yoker, tenla ki yanglutsür aser Tsüngrem mapa tapu balala inyaker. Iba jagi asen lima nung ochi o yazü na aser shitak o meshitak na mebendangteti kümogo. Iba amaji asenok ochimashi agi ochi kümer talangka lia aruba agi tangbo Nagaland nung koba yimten aser koba ozüng agi yimsü asüar mejangjateti kümogo. Alima ka raksadi asünung, iba dang nungi tali teraksaba aser tebenjababo meraksatettsü südi. Tangbo joko government office-tem nung mapa maka saka inyakerbo aika ta kümogo. Ita sen achirbo aika saka mapa inyakerbo mali, senbo aika endoker saka lenmangbo meyanglur, light-bo marur, tzü agibo meperir, government school-tem aika nung kaketshirtem dangbo tesayurtem teimba, government mozü kidang shiranger nem mozü aser chiyongtsü magütsübajibo yutsür anepalur mali nisung aika pei arishi metongjungi alima nungi piladoker. Government nung tulurtemi government kiojen aser ali agi pei meyong rongsen akümba agi joko Nagaland nungbo government-a mali ama kümogo. Nagaland nungbo government akümba mezüng anogo nungi nübortem asoshi terenlok aser tajangzük mapa inyaktsütsü bilema tenzüker masü politics agi business kümer senotsü tajangzük angutsüba indang bilema tenzüker. Joko, Nagaland raksatsütsü bilemer asoshia talila raksatsütsübo anünga melii ka asenoki raksatetogo. Ibaji putu tejen aser tamajung ka tembangba mapang südaktsütsüla aser nübortemi khen atema makamait aser timtem arema Nagaland tasen küma yanglushitsü asoshi pei mapa nung ochishia inyaktsüla aser yimten nunga timtem aser nüngsen arema ochishia shilem agitsüla.