Jurila mapa atema Imran Khan-i sorkar helicopter amshi

Islamabad, Tsüklai 03 (Agencies) : Pakistan Tehreek-i-Insaf (PTI) chairman, Imran Khan-i pei jurila mapa atema official helicopter amshiba asoshi Pakistan National Accountability Bureau (NAB)-i pa anema tapet maparen inyaktsü tenzükogo.
Imran Khan-i KP chief minister indang official helicopter amshiba atema bushisüngdang ka tenzükang ta Khyber Pakhtunkhwa (KP) director general (DG) dang NAB Chairman Javed Iqbal-i tetuyuba agütsüogo.
Pakistan nung ochimashiba maparen azüoktsü atema tentetba luden, NAB ajanga ashiba agi, Imran Khan-i sen ishiba agütsür pa jurila mapa asoshi ghonda 74 sorkar helicopter balala amshi; pai Mi-17 ghonda 22 aser Ecureuil ghonda 52 amshi.
Helicpter amshibaji ghonda nung sen Rs28,000 adoker aser ghonda 74 indangji sen Rs 2.1072 million asütsü, ta report agüja lir.
Aji oda süaka, PTI-ibo pa aitsübaji magizüker ta metetdaktsü aser meyiper NAB dang tanga province-tem aser political party-temi ‘official choppers’ tim mesüi amshiba idang bushisüngdangtsü shiogo.
Osang ajangasa ashiba agi, K-P Chief Minister Pervez Khattak-i pa tashi tim mesüi amshia PTI chief nem state indang helicopter amshidaktsü.
PTI chief Imran Khan-i Banigala, Islamabad, Mardan, Peshawar, Abbottabad, Haripur, Swat, Nathiagali, Kohat, Battagram aser Chakdara yimtitemi or meyipa arudang helicopter-ji amshi, ta Geo News ajanga metetdaktsü.