Kaket zülurtem-i tejashi sayur

India lima tesem balala nung tang mapang tatsüka tsüngda tamangba yimsü amanger telok tulubai tilaba mezüngmeshia amshiba aser taküm dena samatsüba ajanga nübortem mulung aika yirua lir. Iba ama telok tulubai tilaba mezüngmeshiba mapatem ya menokdangteti ao nungbo linük nung azü tokshi lendong tulu ataloktsü ana nung lir. India lima ya ozüng kübok alir sensosangertem asoshi jangratema sadoksadoka alitsüba lima ka lir. Linük temzüngi senso shia nem kechi tsüngrem külemner külemtsü aser kechi jembiner jembitsü asoshi temeten sademsadema agüja lir. Iba jagi India nung senso ajak, kong lidir liaka, kecha tetsübu aser tarendak  melii pei külemnütsü külema aser pei chiajemnütsü chiajema alir. Alima tsüngdang India topur ajungji ibaji lir. Iba jagiang, India ya tsüngremtem aliba lima ta jembir. Ajisüaka, tang mapang tatsüka tsüngda nung Hindu nunger asoshi nashi ya parnok tsüngrem amato külemba shiruru ka asünungji, nashi metepsettsü aser nashi shi machitsü asoshi temzüng azüngba mapa yagi linük nung mepetmesü adok tenzükogo. Iba mepetmesü ya tangsa tang tangatettep kati arua menokdangtetra, ashiko, India yimten nüjiso angudang Hindu aser Muslim na tsüngda azü tokshitepa raratepba amato ataloktsüa akok. Atangji, India nung Hindu nungersa teimba, saka parnoki tanga tamangba yimsü amangertemi amangba yimsü aser achiba chiyongtsü tashi nung teka ia nokdangtsü merangra, alima nung India malitsü. Iba shisabolu jagi India nunger tangatettertem aika nükenbelemtsü tenzükogo. Aji oda, nashi tepsetogo ta temulung melemi bilema kisüng agi nisung tepsetba aser ano kaket zülur dena amokmerena tepsetba mapatem anema kaket zülurtem aikati ola adok tenzükogo. Item kaket zülurtem rongnung linük nung nüngtugu naroküm senpet agütsür  Sahitya Akademia purtemi agütsüba senpet (Award) angur nisung tertrok-teneti kasa senpet meyipa agütsütsü mulungtetbaji kanga jashiba tamaitsü mapa agi sayur ta angatetdi. Atangji, tang amaji tangar dak atalokdang, asenoki ola madokra, asüngbo asenok dak ataloktsü. Sahitya Akademia Award ya linük nung jembiba oshi balala nung kaket zülurtem mapa tajung reprangteta agütsüba senpet lir. Aji oda, iba senpet angur nisung kaji nübortemi kanga akümtsübua aser apayua amshitsüba nübo ka lir. Ajisüaka, iba ama senpet agütsüba telok nung züngsem aser kaket zülur M.M.Kalburgi tepsetba mapajibo onsara majung aser iba jagi Sahitya Akademia nung züngsem aser Sahitya Akademia Award angurtem aika mulung yirutsüogo. Ano, iba ama linük nung kin tulubai kin tilabatem mezüngmeshia taküm dena samatsüba mapang Sahitya Akademia nung lenirtemi ola madokba agi balaka kaketzülurtemi tejashi sayua parnok nem agütsüba award meyipa agütsütsü mulungtetogo. Iba jagi asenok ajak nem tangatetba ka agütsür. Iba ola jagi linük nung ato kilonser Narendra Modi mulungjang nung jembitsü imlar. India ama senso ajak kasasa jenjang nung sademsadema alitsü asoshi temzüng ozüng lateta aliba lima ka nung, koba sokar arudir arung aser shiba ato kilonser kümdir kümang, iba sorkarji Hindu, Muslim mesüra Khristan sorkar masü saka nübortemi nübortem asoshi akümba sorkar asütsüla aser nübortem rongnung kin kidong aser tamangba yimsü mebendangi ajak India nunger senso ama reprangba ato kilonser asütsüla. Tang amai, tebang agi tapu tapu jembiaka, mapa agibo telok tulubai amangba yimsü amangtsüla aser telok tulubai achiba chiyongtsü dang achitsüla ta inyaka telok tilaba purtem mezüngmeshidaktsüra, Mahatma Gandhi aser Rabindranath Tagore nungertemi pongmangba aser aginüba India kodanga mekümtettsü. Narendra Modii sangdongba ama, alima aso 21 buba yabo India meyong süra India sensosangertem dang ya chiang aser yabo techi, ya amangang aser yabo tamang ta masü saka kechi chiajemdir jemaka aser koba tsüngrem külemdir külemaka, India ajungkettsü aser India sentsüwangshitsü asoshi inyaktsübajiang ajungshiteptsüla. Iba tangatetba aser tenangzükba nung kaket zülurtem aser talisa Sahitya Akademia Award ngua alirtem dang ato kilonseri o kabo ashitsü imlaa atar.

You must be logged in to post a comment Login