Kaketshirtemi pei sempet jangjar mongin akumtsüla: Dr. Temsuwati

Mokokchung, 18 Jan (TYO): 37 buba Ongpangkong Kaketshir Mungdang (OKM) lokti senden tanü agi anogo ananübuba yangi Ungma yimtiba nung “Takoktsütem Alemdanga” omen nung ajemdaker mungdaki. Taküm iba mungdang nung OKM kübok unit 17 nungi tejaoker meyi ka shi adenshia shilem agidar.
Aenjeti 18 nü anepdang sentong nung OKM nüngo kaket sayatsür taoba Addl. Development Commissioner, Dr. Temsüwati-i jembidang, kaketshir ka teinyaktsü ajak agi kaket meranga azüngtsüba dang lir, anungji, meranga züngar takoker kaka akümtsü asoshi ajungshia liasü.
Nisung shia nem Tsüngremi sempet balala moaja lir, iba sempetji pei sasa angatettsü merangtsüla, pei sempet memetetba kaketshir kati takok junga mungutettsü, anungji, kaketshir shiai pei sempet angateta iba nungji mongin akümtsü asoshi paisa inyakdaktsünüba o ka lemsatep. “Nai jangraba kaji shingaia bener aotsü makok, ne takümji ne meyong meyong lir,” ta paisa ashi.
Tanü joko zünger mapa manguba tebilemtsü ya ulura kümogo, iba ajanga lokti tebilemtsü aika adoker, anungji, sorkar mapa dak dang merangloktsüla, kechiyong sorkar mapaji kanga apara asünung ajakibo mangutsü, ta ashi. Paisa iba dak sendakba nung ashidang, pei sasa sempet meteta meranga inyaker tepok sünga alitsü asoshi ajungshia liasü.
Taküm nung tetsükdakba aika ajurutsüa akok, ajisüaka temulungtetba tulu yur inyakra mangdangji matalokiang malitsü aser ne dak tangatetba tejangja lira ibaji shingaia sottsü makok, ta pai ashi.
Paisa tatishitsü taküm kaka alitsü asoshi ashidang, “na kechi inyakdir inyakaka, koba nung lidir liaka, tatishitsü aketba nübo ka asütsü merangtsüla.”
Taoba mapangbo Ao kinji mezüngpur ka liasü, aji saka, tanübo lenmang aisü nung asenok tesülen lir, aji saka, teimla mesamai mangdang tajung yur maparen balala inyaktsü asoshi paisa tayongzükba agütsü.
Asen jakdang takoktsütem aika lir, aji saka, aiben azümesenba mesüra tezüdangba agi asenoki takok mangutsüa akok. Aji oda, asenoki makoktsüba nung mapang meindoki takoktsü lenmangtem bushitsü asoshi paisa mungdangertem ayongzüka liasü.
Sentong nung OKM tir, R. Sunep Pongen-i lokti pelaa agizük. Pfutsero SDPO, Aotula T Imchen IPS-i ajungmeso o tajung bener arua lemsatep aser Naga Students’ Federation tongti zülur Imtiyapang Imsongi otep o tatsüka jembi. MTBA Pastor Rev. Ponen Longchar-i kaketshirtem atema temoatsü meshia sarasademtsü. OKM Achievers’ Award ta sür Ongpangkong kaketshir rongnung tangar dang alakteta takok angur parnok 31 nem tetushi agütsü.
Tanü anüngdang mezüngbuba Ongpangkong Kaketshir Mungdang (OKM) “Ao Oshi Tetoktepba” ta sür Olung Lutet (Spell Bee) tetoktepba sentong-a ka agia liasü. Iba sentong nungji Ao Senden Literature Board (ASLB) Chief Patron Jemti Mollier akhüm agütsür ka ama arua shilem agia liasü. Iba tetoktepba nung takok angurji; Mokokchung yim nungi Odimongla, tanabubaji Aliba nungi Imtimongla, tasembubaji Küpza nungi Waisangla aser pezübuba nung Chuchuyimpang nungi Arenmenla nungertem liasü. Takoker nem kuli kaket den senpet sen 20,000/-, 10,000/-, 5,000/- aser 3,000/- agütsü.
Nikongdang ‘Sobaliba Arangshi’ ta sür sentong ka Soyim Aonglenden nung agi aser iba nungji OKM kübok unit balalai sobaliba kentenmenü, yar tsüngsang aser saya tapu balala sayua liasü.
Aonung sentong nung “Exceeding the possibilities: Authentic Individual towards Social Integrity” onük nung ajemdaker Urban and International Students’ Ministry (UESI) Secretary, Imnazülu Jamiri jembidang, koba lokti sudir süaka, nükla maliba lokti kati kodanga alizüng metongtettsü, anungji, nükla tejangja ayuba den asalendong tajung nung pei dang nungi pi taoba ta züngshia, temeim nung tatok agüja, ajemaluba nung ochi shia litetba taküm asütsü aser pei tajungtiba agi lokti tenzüktsü tayongzüka agütsü.
37 buba OKM lokti senden ya Jan 19 nü tembangtsü aser tatembang sentong nung Health and Family Welfare, Election & Parliamentary Affairs minister, Imkong L Imchen tongti tesemdanger asütsü jaoka lir.