Kangabo mariteptsüla !

Nagaland chief minister T.R.Zeliang-i anir Lok sabha MP Neiphiu Rio dena parnok yimsüsürtem kar oagi Delhi nung centre government nung lenirtem ajurua taküm 2017 küm Christmas matongdangsa Naga yimten latetdaktsüner ta jembia senzübaji mapa shitak ka inyaka jajaogo. Naga yimten tebilemtsü ken o ya yimten nung benoka jembir joko küm noklang ajunger aser ano külen India government o NSCN-IM telok na tsüngda yimjung yanglur küm metsü abensar. Item kümtemji sükdangra, mapang talangka yimten tebilemtsü ya tatembang mekümteti Naga nungertem kanga timtema aruogo ta sükdangtetter. Ano, Naga nunger asoshi timtem aser takoksa talila ajurubaji küm aika India den Naga yimten tebilemtsü melatetteti arudang telemsa tali adoka linük tenzüker telok aika küma aoba ya asütsü. Joko, Naga yimten nüchiso bushir telok aika aküm nungji, saru onsara kümer Nagaland government dena junga moutettsüsa timtemba maparen aika nung reprangtetter. Iba amaisa ora, Nagaland agi matitsü aser Naga yimten nüchiso bushir teloktem  yaa kechika küma aotsüar memetetba tia ka nung ajemoktsü. Iba jagi, Naga yimten tebilemtsü ya akok tashi tekaraba nung tatembang küma latettsü nüngdaker. Atangji, osang ajanga angazükba agi, India government o NSCN-IM telok na tsüngdangbo joko ken o tasakbo ajak tembanga jembimar tatembangleni arutsü ana nung lir, anungji mashi mapang ka nung telemtetba ka dangi arutsüa akok. Ajisüaka, ano tebilemdangtsü kaji, tang Naga nunger nüchiso bushir telok trok longjemer yimjung nung India government den jembi tenzüker ano ita ana ta majung, anungji parnok tsüngda yimten ken o bo ano benoka mejembika asütsü, anungji parnokjia kenbo atatsüla adoktsü. Naga nungertemi dang masü saka India government-ia Naga yimten tebilemtsü ken o ya telok ka den dang masü saka Naga nunger telok ajak den külemi latetner. Ibaji, India nunger asoshi dang masü saka Naga nunger asoshi shisataka mapa asütsü. Ken o bo kasa Naga yimten ken o, saka telok aikati jembir, anungji telok ajak denji ajurutepa jembitsüla saka tatem nungbo telok ajak jagi külemi shilem aika telatetba kati arutsüla. Aji oda, Naga yimten tebilemtsü ken o ya khen nung telok ajak den külemi dang latettsü ta India government-ia shiadokogo. Atangji, Naga yimten tebilemtsü ken o ya tasen masünungji, Naga nunger temeten aser taginübaji India government-ia temetet dang lir, anungji India küboksa jenjang tera tajungba nung alitsüsa latettsü atemabo mapang magitsü südi. Ajisüaka, Naga nunger rongnung telemsa onsara nungji telok ajak nem mapang peria agüja ken o angadangtsübaji tongtibang asütsü. Item ajakji bilemdang dang tang anogo 45 tsüngdangsabo Naga yimten ken o ya tatembangbang küma latettsübo tasak asütsü südi ta bilemer. Atangji, Nagaland nung yimsüsürtemi taküm Christmas matongdangsa telemtetba ka dangi arudaktsünüba tongtibang kuli ka lir. Ibaji Naga yimten tebilemtsü ya melatetteti election agiba sülen mapang tatsüka tsüngda Naga yimten telatetba kati arura, parnok ajak anentsüsa akümtsü, anungji takoksa tulu angutsü. Ibayongji, mapa bolua sentsü tsüa election magii ataba tajungba asütsü ta yimsüsürtemi bilemer. Iba tangatetba nung, ano yimsüsürtemi tatar senden nung pangzüng tajung ka zünger India government aser Election Commission nem metetdaktsüra, ashiko, mapa küma aotsüa akok. Iba tangatetba nung yimsüsürtemi dang masü saka nütsüng nübo ajaki election magii dang Naga yimten tebilemtsü ya tama latetner. Ajisüaka, asenoki angatettsüba kaji, mapang papika ya ken o melemtetteti arur, tang tesüsa ita ka ana tsüngda Naga yimten latettsü aritepra, iba jagi tajung ka nung oa metembangtettsüa akok. Anungji, kangabo mariteptsüla saka temenua kangabo memenutsüla.