Kashmir onük nung shingaia India menokdangtettsü: Rajnath

Bardoli, October 14 (Agencies): Honibarnü Union Home Minister, Rajnath Singh-i Kashmir onük latettsü atema alima nung tashi aliba linük kechaia India sorkar menokdangtettsü, ta metetdaktsü.
Singh-i ashiba agi, kiralongrartem anema inyaktsü aser Kashmir arrtsülen injang nokdangtsü atema NDA sorkari Army nem tashi agutsüogo.
“Kashmir atema shingaia shisa mebulutsüla. Iba onük latettsü atema alima nung kecha tashi agia asenok menokdangtettsü,” ta pai ashi.
Surat district kübok Bardoli nung BJP nüboyim ‘Gaurav Yatra’ lokti senden ka nung jembidang Singh-i, Pakistan-i par kiralongrartem India-i yoker aser iba linük raksatsüner, ta aitsü.
“Pakistan ya asen kidanger linük lir. Par linük nüngjaji ‘Pak’-istan lir, ajisüaka parnoki mapa tamajungtem inyaker aser India raksatsütsü atema kiralongrartem yoker,” ta Home Minister-isa ashi.
“Pakistan ya kidanger linük ka asübayong asen Ato kilonser, Narendra Modi-i yimjung yanglutsü atema tajungtiba nung meranga inyakogo. Pai inyakyim-a raksaa Pakistan-i ogo, ajisüaka Pakistan-i mapa tamajung inyakba manener. Iba amai mapang talangkabo meyutsütsüla,” ta pai ashi.
Home minister, Rajnath-i ashiba agi, pai Army dang Kashmir arrtsülen Pakistan dang wako temesüng (yimjung temaitsü) mesayutsüla, saka inyjang agi telangzüba agujang ta tuyuogo.
Taküm Gujarat nung assembly election agitsü lia BJP-i election nüboyima `gaurav yatra’ tenzükogo. BJP lenirtem aser Union minister tem aikati iba campaign nung shilem agia jembia arudar.