Kaziranga nung kentok anüktsü atema azü 2 bener aruogo

Guwahati, July 5 (Agencies) : Assam kübok Kaziranga National Park nung kentok tepsetertem mittsü atema sniffer dog ka dang liasü saka iba azü den yariteptsü atema azü ana ayutsü telemtetba agiogo.
Kaziranga National Park ketdangsertemi sniffer dog ana – Kareena o Babli na kentok kümzüktsü atema ayutsü lemtet.
Azü ana ya ita aika training agiba sülen Assam-i anir aruogo aser kobi melii mapa lemzüktsütsü, ta ketdangser kati ashi.
“Ozüng anema shiruru tepsetertem azüoktsü atema inyakba mapa nung azütemi tongtipang shilem agiba bushitetogo. Asen min nung ibala azü aika nüngdaker. Azütemi kuli tejangja agütsür aser parnoki ozüng anema shiruru shibelenertem tsüngsü meteter aser parnoki bener aoba osettsüset mesüra shiruru nguteter” ta wildlife trade monitoring network TRAFFIC ketdangser, Dr Shekhar Kumar Niraj-i osangbener dang ashi.
TRAFFIC ajanga Kareena ta ser German Shepherd ka bener aru aser Guwahati nung amenoka aliba shiruru kümzüker telok Aaranyak-i Babli ta ser Belgian Shepherd ka agütsü.
2013 nungi Kaziranga nung azü amshitsü tenzük aser ibaji Aaranyak teloki Slovakia linük nungi Jorba bener aruba liasü.
Küm pungu tain Jorba-i Kaziranga nüka mittsü tenzükba nungi nsiung 10 tashi puogo aser ibaji takok tulu lir ta park ketdangsertemi ashir.
“Onok kanga pelar. Azü ajanga noklang nung shilem 60 takok nguogo. Khen khen meta tamajung aser tzünglu arubatem ajanga parnok tetsükdaktsü ajurur” ta Kaziranga park director, M K Yadava-ia metetdaktsü.
Shiruru shibelener kati oset toktsüba mesüra pa tsüngnep ajanga azüi nisungji menemteta oteter, ta paisa shisem.

You must be logged in to post a comment Login