Kei Nishikori New York Open semifinal tongtetogo

New York, Tsüklai 17 (Agencies): Rogonü New York Open nung Moldova nunger Radu Albot koka semifinal asayatsü asoshi maongka ngutetba sülen, Kei Nishikori küm anabuba nung tang mezüngbuba ATP Tour nung asayatettsüsa jenjang ka tongtetogo.
Japang nunger asayar ya ita pongu tashi yiruba ajanga masayai arur tang Long Island asayamung nung pai 4-6, 6-3, 6-1 agi Albot madak takok nguogo.
Yaküm teka yiruba ajanga junga masayateti Nishikori 2014 nungi yaküm tashi nung mezüngbuba top 20 tsünglangi alu.
Arishi küm 28 tain asayar yagi iba asayamung küm pezü tashi atonga koka lir, aser pa taruba asaya South Africa nunger asayar Kevin Anderson mesera America nunger asayar hopeful Frances Tiafoe den asayatsü.
Kasa mapang nung second seed Sam Querrey-i Croatia nunger asayar tejen Ivo Karlovic straight sets nung 7-6 (7/5), 7-6 (7/4) agi koka home fans tem peladakja liasü.
Querrey tang jenjang 12buba nung lir aser pai Karlovic den asaya nung service kanga junga aoba ajanga teyari tulu agütsü. Pai service mapang point trok dang loss asü.
“Ni iba dang nungi tajungba serve süteter lila. Ni küna deuce asaya asü masayar mejangja aser ni service kanga junga oteta liasü aser iba ajanga tie-break mapang nung ni kanga sadema asayatet,” ta Querrey-i ashi.
Querrey taruba asaya France nunger Adrian Mannarino den asayatsü. Mannarino-i Spain nunger asayar Adrian Menendez-Maceiras 7-5, 2-6, 6-3 agi koka semifinal tongteta liasü.

You must be logged in to post a comment Login