Khaleda Zia küm pongu tepuokdaki yoker

Dhaka, Tsüklai 08 (Agencies) : Ochimashiba maparen dak sendakba nung taoba Bangladesh Ato Kilonser aser opposition BNP chief Khaleda Zia küm pongu tepuokdaki yoktsü atema tanü Yangtepnü obendang agütsüogo. Lajartem atema ta ser bendanglen nungi yokba sen million 21 takas(US dollar 252,000) ochimeshii amshiba dak sendakba nung arishi küm 72 tain Zia anema Dhaka yimtiba nungi Special Court-5 ajanga iba obendangbaji agütsü.
Kasa ken o nungsa lar jabaso Tarique Rahman den tangar pezü densema aitsüogo aser parnokjibo küm 10 tsüngden chiokdak ayutsü atema latettsüogo.
Taoba ato kilonseri la okadak menokdaktsü atema meranga inyakdang saka ibaji Supreme Court-i magizük.
Anti-Corruption Commission (ACC) ajanga benokba ken o koba Metsüremi 19, 2014 nung lower court ajanga obendang agütsü, ibaji shidak ta high court-ia tamalen kuli agütsüogo; iba mapang nunga Zia-ji ochimashiba ken o ana nung aitsü.
ACC-i ashiba agi, lajartem anepalutsü taser tenzükba ‘Orphanage trust’ anaji tezüluba nung dang ashi mapa inyakba kecha maliasü. Orpganage ana atema bendanglen nungi yokba teyari sen paikaji lai ochimashi maparen nung amshi; ibaji la ato kilonser ser 2001-2006 tsüngda BNP sorkar yimsüsüba mapang inyak, ta kasa osang ajanga metetdaktsü.