Khandu-i state atema IAS, IPS cadre balaka agütsütsü asüngdang

Itanagar, September 14 (Agencies): Arunachal Pradesh Chief Minister Pema Khandu-i par state atema IAS, IPS cadre balaka agütsütsü asoshi Home Minister Rajnath Singh den New Delhi nung ajurutepba mapang nung benoka liasü.
Tang tashi nung state ya AGMUT cadre kübok dang lir koba ajanga Arunachal Pradesh, Goa, Mizoram aser Union Territories ajak tenzüker.
“AGMUT cadre nung ketdangsertem küm ana asem atema dang seniority dak ajemdaker inyaker. Institutional memory maliba, policy aser sentong tem nung adhocism nunger ya iba ajanga adok daktsüba timtemtem lir,” ta Khandu-i ashi.
Home minister Rajnath Singh-i iba dak sendakba nung pai akokba tashi agi state nem teyari agütsütsü asoshi nangzükogo, ta kasa sangdong ajanga metetdaktsü.
Khandu-isa ashiba agi, bendanga agütsüa inyakba ketdangsertem maliba ajanga state tang tashi teinyaktettsüba jenjang ka metongteti lir.
“Anungji state terenlok dak rangloker ketdangsüba maparen takok nung maneni bener aotsü atema bendanga agüja inyakba ketdangsertem nüngdaker ta bilemer,” ta paisa ashi.
Ajiasünung AGMUT nungi Arunachal Pradesh pilaa aotsübaji kanga tongtibang aser jongdak tenüngdakba ka lir, ta state atema cadre balaka kümtettsü asoshi nokdaka Khandu-i ashi.