Khristantem kanga reshikangshiba linükji North Korea: Open Doors

Washington, Aenjeti (January) 12 (Agencies): Alima nung Khristantem kanga reshikangshiba linüktem rongnung North Korea mezüngbuba jenjang nung lir aser iba ya küm 16 buba atongtepa bushitetba lir.
Open Doors USA-i alima nung linüktem asadangba nung Afghanistan tanabuba jenjang nung aser North Korea dak alaka tematiba jenjang 10 rongnung Muslim mnunger linüktem dang lir.
“Open Doors-i alima nung reshikangshi ajuruba Khristantem pusemer aser parnok asoshi jembitsü” ta Open Doors USA indang CEO & president, David Curry-i Aenjeti 10 nü Washington nung linük tarensen metetdaktsüdang ashi.
“Onoki alima dang temeten agütsütsü atema tashi amshiang ta ayongzüker. Iba tarensen ajanga alima nung temeten nüngdakba tesemtem nung onoki mapa inyaktsü” ta paisa ashi.
Islamic State telok, North Korea sorkar, Islamic extremism, tashiyim agi shi nung medemba aser tashiyim agi kibong kümdaktsüba inyakyimtem nung ajemdaker Open Doors-i Khristantem reshikangshiba asadanger, ta Curry-isa shisem.
Iba tenüng tarensen ya Open Doors-i kümshia asadanga adoker aser tesüiba küm 26 tashi parnoki iba mapa inyaka arur.
Khristantem kanga reshikangshiba linük tematiba 10:
North Korea (94 points) -Khristan aser Khristan missionary tem mapang shia labor camps nung puoka ayur.
Afghanistan (93 points) – Iba Muslim linük nung sorkari par Khristan sensotem magizüker.
Somalia (91 points) – Mogadishu nung Catholic bishop-i Somalia nung Khristan ka asütsüji tamakoktsü ta ashi.
Sudan (87 points) – Muslim sorkari iba linük nung Khristan tenla kitem raksatsü telemtetba agiogo.
Pakistan (86 points) – Khristan aser Muslim masürtem dak Islam mezüngmeshiba atema tai tonglokja tasüba temerenshi agütsür.
Eritrea (86 points) – Iba linük nung tamangba yimsü pezü dang agizüker aser itemji Sunni Islam, Eritrean Orthodox, Roman Catholic aser Evangelical Lutheran churches. Tanga tamangba yimsü amangertem sorkari reshikangshir aser timtem agütsür.
Libya (86 points) – Sorkari Coptic Khristantem amaktsü atema telungpurtem nem training agütsü ta osang angazüker.
Iraq (86 points) – ISIS-i aridokba sülen Iraqi Khristantem tanaben linüki meyipa maru lir.
Yemen (85 points) – Iba linük nung sorkar ketdansübaren nung timtem ajuruba ajanga Khristan aser tanga tamangba yimsü nung telok tilatem okronger.
Iran (85 points) – Khristantem dena tamangba yimsü tsütsü telok tilatem sadoksadoka amangtsü asoshi nüjiso mangur.
Tematiba linük 10 sülen jenjang 11 buba India lir aser ibaji Hindu nationalism ajanga tanga tamangba yimsü teloktem kanga reshikangshir.