Ki rongnung jenjang tasaktiba Kumar Mangalam Birla-i aliogo

Kumar Mangalam BirlaMumbai, September 08 (Agencies): Malabar Hill nung aliba nüngtugu ki ‘Jatia’ mapang takangka li külen tan yoka otsü tasen ka yangluogo.

Iba ki kibur tasenbaji Aditya Birla Group nungi Kumar Mangalam Birla kümogo. Pai iba sq ft 25,000 ki ya Hombar nü auction asüba mapang sen crore 425 agi aliogo aser ibaji ajanga iba ki ya India nung ki rongnung sen tasaktiba kümogo.

Ibai mayokdang ki rongnung jenjang tasaktibaji kasa tesem nungisa 2011 küm sen crore 400 agi ayokba ‘Maheshwari’ ki liasü. Ano ‘Jatia’ nungi tatsüka dang pilar aliba Homi Bhabha indang ki ‘Mehrangir’-a 2014 küm sen crore 372 agi yoka liasü.

Auction asüba sentongji Jones Lang LaSalle nungi ketdangser kati acha ayanga liasü aser pai ki ayokba osang tejangja metetdaktsüba mapang ki ayokba jenjang noklang nung shilem 10 bo talisangi tang agujang ta ashi aser tanüngbaji tarutsü mapangtem nung agütsütsü metetdaktsü.

Iba ki yagi ali sq ft 25,000 sübanga lir. Ibai yimti nung ki ayokba rongnung jenjang tasaktiba lir. Küm aika yimti nung sen srore 400 dak tema agi ki ayokba maliasü.

Tang aliba jenjang agi inyakdangra iba kimong sq ft ka nung sen lakh 1.7 adoker. Iba kimong tasazük ajak agi sq m 2,926 (sq ft 31,495) lir aser iba ya Malabar Hill nung Little Gibbs lenmang nung lir.

Iba ki ya Y Jatia-i 1970 meta M C Vakeel dang ali aser tang iba kidang adianu Arun aser Shyam Jatia na telidak lir. Par kibong ya paper dak sentakba ‘Pudumjee Industries’ indang kibur lir.

Tang Altamount Road nung alisang, Birla-i iba ki ya pa nija asoshi alirba lir. Pa tang aliba aser tan tasen aliba ki ana tsüngdaji gari nung minute 10 dang jajar.

Aditya Birla Group nung otongdar kati, “Onokibo iba ki jenjang atema kecha meshitettsü,” ta ashi.

You must be logged in to post a comment Login